BANDUNG (NYUNDAYU.COM), – PD Kesatuan Perempuan Partai Golkar (KPPG) Jawa Barat nargetkeun kapangurusan geus bisa kabentuk di 27 kota/kabupaten di Jabar.
Ketua KPPG Jabar, Cucu Sugyati nétélakeun kapangurusan KPPG di sakuliah wilayah di Jabar sagancangna bakal geura kabentuk. Hal éta geus jadi targét pikeun ngadongkrak sora Golkar di Jabar dina pemilu ka hareup.
“Alhamdulillah pami tingkat kacamatan parantos kabentuk sadayana. Abdi miharep KPPG Tingkat Désa ogé tiasa kabentuk saénggalna di sakuliah Jabar,” ceuk Cucu nu ogé Wakil Ketua Komisi IV DPRD Jabar ieu, minggu kamari.
Numutkeun anjeunna, ku gancangna dibentuk kapangurusan KPPG nu lengkep nepika tingkat desa diniléy bisa dirasakeun mangpaatna ku sakumna masarakat.
“Kumargi istri nu aktip sareng pamikiranna maju, janten salah sahiji konci kalaksanana pangwangunan,” pok caleg DPRD Jabar ti Dapil 2 (Kab. Bandung) ieu.
KPPG, Cucu neruskeun, nyaéta organisasi partai nu miboga tugas pikeun ilubiung ngameunangkeun Partai Golkar dina Pemilu nu datang.
“Kumargi éta, abdi nyungkeun sadaya pangurus sareng kader KPPG kanggo silih rojong paéh poso kanggo kameunangan Partai Golkar di 2024. Waktos urang kanggo ngéngingkeun Golkar sakedap deui, nyaéta dugika suksés dina Hari Kasih Suara dina kaping 14 Februari ka payun,” tandes Wakil Ketua SOKSI Depidar Jabar ieu.**
*bas*
