BANDUNG (NYUNDAYU.COM) – Kandidat Calon Gubernur Jabar, Dr. Bima Arya teu hariwang teuing ku popularitas jeung éléktabilitasna nu aya di handapeun Ridwan Kamil atanapi jeung Dedi Mulyadi. Kulantaran basa tarung di Pilwalkot Bogor taun 2013 kamari, PAN ngan miboga 3 korsi, sarta lawanna nyaéta incumbent jeung tokoh nu geus ngakar di Kota Bogor.
“Pulitik mah dinamis. Basa nyungkeun ijin ti ibu abdi kanggo majeng di Pilwakot Bogor, survey abdi teu langkung ti 10%. Lawanna ogé beurat pisan. Spirit abdi mah, ‘Just do the best, and let God do the rest’. Urusan abdi mah mung ikhtiar, ngawanohkeun gagasan, kukurilingan, ngawangkong,” ceuk Bima Arya.
Kedalan ieu ditepikeun Bima basa ngajawab patanyaan dua panelis, pangamat pulitik Unpad Firman naman jeung Dewan Pakar ICMI Muslim Mufty, dina serial diskusi pilkada nu judulna “Mencari Pemimpin Pilihan Rakyat”, nu diinisiasi Jaringan Media Siber Indonesia (JMSI) Jabar jeung PW Muhammadiyah Jabar, di secretariat JMSI, Jl. Maskumambang Kota Bandung, Minggu (7/7).
Muslim méré bongbolongan ka Bima pikeun jadi Cawagub Ridwan Kamil. “Tingkat Probabilitas pimeunangeunanana luhur, dugika ide sareng gagasan Bima nu luar biasa baris kajaga salami lima taun, sakaligus sabar ngantos lima taun sateuacan janten Gubernur di 2029,” pokna.
Firman malahmah miharep Bima maju jadi Bakal Calon Gubernur. Kulantaran ide jeung gagasan ngan bisa diréalisasikeun lamun jadi gubernur. “Pamikiran nu urang sadayana kénging sonten ieu ti Pa Bima ku luar biasana, mung lebar upami teu diéksekusi. Nu paling penting mah nyaéta diferensiasi sareng calon-calon sanés, sapertos Ridwan Kamil, supados tiasa dipilih ku rahayat.”
Numutkeun Bima, jadi Bakal Calon Gubernur Jabar lain urusan gagasan atanapi kahayang sora ti handap alias grassroot wungkul. “Ieu urusan para Dewa di Jakarta. DPP Partai oge tiasa mutuskeun nyalira kumargi kedah dibadamikeun sareng KIM atanapi partai nu sanésna. Tugas abdi mah ngadugikeun gagasan sareng ningkatkeun éléktabilitas, kumargi pami engkin disurvéy, hasilna tiasa saé,” ceuk Arya.
Inyana teu bisa ti ayeuna mutuskeun pikeun jadi Cawagub Ridwan Kamil atanapi Dedi Mulyadi atanapi jeung calon séjénna. “Janten abdi ngabuka komunikasi ka sadayana, kalebet Pa Dedi Mulyadi. Saha nu tiasa ngajamin Pa Ridwan Kamil pasti dicalonkeun di Jabar? Sanaos leres abdi caket sareng Pa Ridwan Kamil,” émboh Bima.**
Éditor: Dadan Hendaya
