BANDUNG (NYUNDAYU). – Ti saprak perencanaan nepika Bandara Kertajati, Majalengka, geus operasi nepika ayeuna, dana ti APBD Provinsi Jawa Barat geus ngucur sakitar Rp7 triliun. Angka éta teu sabanding jeung manfaat pikeun Pemrov atawa warga Jabar.
“Dugika ayeuna, Bandarudara Internasional Jawa Barat teras janten cost center. Ulah dugika BIJB ngaduruk artos waé,” ceuk Wakil Ketua Kadin Jabar Aldo F. Widiyana, di hareupeun pengurus Jaringan Média Siber Indonésia (JMSI) Jabar, basa diskusi di Sekretariat PHRI Jabar, Senén (5/9) soré.
Ceuk manéhna, dibutuhkeun political will ti pamaréntah pusat atawa pemprov pikeun ngamanfaatkeun bandara panggedéna kadua di Indonésia ieu. “Tanpa kahoyong anu kiat ti pamaréntah, nya Bandara Kertajati ngan bakal sapertos kieu, hirup horéam paéh teu hayang,” ceuk pamilik usaha transportasi ieu.
Dina penilaian Aldo, manajemen BIJB kurang miboga networking anu alus jeung pihak anu boga kepentingan, utamana pamaréntah pusat.
“Manajemen atanapi networkingna kirang. Kumaha batur bakal percaya nganggo bandara ieu, upami aspék jaringan sareng palayanan henteu diperhartoskeun.”
Basa dikontak dina waktu séjén, anggota DPRD Jabar Daddy Rohendi, nepikeun hal anu sarua. “Abdi atos sababaraha kali ngadugikeun, yén abdi henteu ikhlas artos APBD saseueur éta mung ngahasilkeun bandara anu ampir teu fungsi sapertos ayeuna,” pokna.
Kahadiran Pengurus JMSI nyaéta pikeun ngarencanakeun diskusi bareng jeung Kadin Jabar, judulna “Optimalisasi Bandara Kertajati” anu bakal digelar poé Jumaah (9/9) soré, di Gedung Kadin Jabar. Diskusi ieu bakal digelar sacara runtuyan ku ngahadirkeun para tokoh anu kompetén.*
Mangga di-follow akun resmi sosial media sim kuring:
