BANDUNG (NYUNDAYU). – Progréss operasional Bandara Kertajati, di Majaléngka masih tacan luyu jeung harepan. Dana triliunan anu geus dikucurkeun APBD Provinsi Jawa Barat ogé acan méré hasil anu signifikan. PT BIJB dititah narik invéstor pikeun ngabuka salega-legana gawébareng jeung palaku bisnis sangkan kondisi keuangan teu pati parah.
Kitu ogé benang mérah diskusi seri kahiji ngeunaan Bandara Kertajati anu diinisiasi JMSI Jabar jeung Kadin Jabar, Jumaah (9/9). Hadir salaku pembicara, Asda Ekbang Setda Jabar Taufiq Budi Santoso, Dirut PT Bandarudara Internasional Jawa Barat (BIJB) Muhammad Singgih jeung anggota Banggar DPR RI H. Mulyadi.
Numutkeun Asda Ekbang, kondisi éta disababkeun ku loba hal. “Aksésabilitas Tol Cisumdawu anu acan réngsé, dampak sasalad Covid-19 anu ngaganggu sakabéh sendi ékonomi. Bandara Huséin anu masih operasi, harga avtur di Kertajati anu leuwih luhur tibatan di Bandara Cengkaréng jeung sajabana,” ceuk mantan Kepala Bapeda Jabar éta.
Progréss geus leuwih alus.
Numutkeun Dirut PT BIJB, dibanding taun kamari, progréss taun 2022 geus jauh leuwih alus, “Cargo atos naék 4.000%, teras di awal taun parantos kontrak sareng pausahaan aircraft maintenance pikeun jasa perbaikan pesawat. Émang artos anu lebet taun ayeuna alit kénéh, dugi ka Rp900 juta sabulan. Tapi langkung ageung tibatan taun kamari anu mung Rp5 milyar sataun.” ceuk Singgih.
Kudu diakui kondisi keuangan masIh tacan stabil, ku sabab biaya overhead –di luar kawajiban mayar hutang– sakitar Rp4-5 milyar sabulan. “Tapi ku rencana janten embarkasi umroh per Séptémber ieu, terus diréngsékeunnana jalan Tol Cisumdawu akhir taun ieu. Abdi yakin bakal jadi prospék anu saé kanggo BIJB.” pokna.
Mulyadi mokuskeun kana pentingna BIJB ngajak terus invéstor gawébareng jeung para pangusaha anu pakait jeung airlines. “Abdi ogé baris ngawal anggaran ti pamaréntah pusat, sareng kaberpihakan Kamenterian PUPR sareng Kemenhub kanggo komitmen ngadukung pinuh Kertajati. Kumargi anggaran pami teu dikawal, tiasa waé les ngaleungit,” pokna.
Koméntar rada provokatif didugikeun anggota Komisi IV DPRD Jabar Daddy Rohendi. “Waduk ah istilah raray panghareupna ibukota! Jujur abdi mah sedih dana Rp7 triliun teu sabanding jeung anu dihasilkeun. Tingali wéh bandara-bandara séjén anu diwangun sanggeus Kertajati, siga Kualanamu, Ahmad Yani, Kulonprogo. Nu urang mah malah jadi pangtukangna,” tegesna.
Diskusi anu bakal lumangsung dina sababaraha séri ieu, dibuka ku Ketua JMSI Pusat Teguh Santosa jeung Ketua Kadin Jabar Cucu Sutara. Para tamu anu hadir di antarana datang ti biro travel, manajemen Bandara Huséin Sastranegara, pimpinan pausahaan cargo jeung pangurus Kadin Jabar.*
Éditor : Dadan Hendaya
