BANDUNG (NYUNDAYU.COM), – Bandung Interctive Hub – Balad Uwa Mahfud (BIH-BUM) ngagelar acara sarapan pagi jeung sajumlah 200 gowéser, di Café Kampring, Jl. Maskumambang 39 Kota Bandung, Minggu (14/1).
Gowéser ti sababaraha komunitas ngumpul minuhan acara ieu. Arinyana geus daratang ti isuk-isuk kénéh pikeun sarapan, nyantai jeung nyanyi babarengan dipirig ku band akustikan.
Numutkeun Ketua BIH-BUM Iwan Setiawan, acara ieu murni kagiatan santai, tanpa dibungbuan ku kampanye nanaon. “Urang sadaya mung palay silaturahim sareng para gowéser di Bandung, ngaraketkeun diri, kumargi leres seueur di antara anggota BIH nu ogé gowéser,” pokna.
Inyana miharep BIH bisa jadi tempat ngumpul rupa-rupa komunitas. “Leupaskeun heula sual warna pulitik. BIH leres janten organ kanggo ngéngingkeun Prof. Mahfud, namung sanés hartosna nutup komunikasi sareng pihak sanés,” émbohna.**
Éditor: Dadan Hendaya
