BANDUNG, (NYUNDAYU) – Dina poé Jumaah (14/10/2022), di hiji imah tukangeun Hotel Horison ngadadak ramé ku barudak. Raména teh ku pada ngarobrol sabari balakécrakan ngadahar baso jeung sangu hainan nu disadiakeun. Saméméhna, 50 barudak nu daratang ti Panti Asuhan Taman Harapan Muhammadiyah Bandung ieu teh ngararaji heula ku dariana.
Hadirna barudak ieu teh dina raraga Sukuran Pamukaan Kafé Kampring nu pernahna aya di Jalan Maskumambang No. 39 Turangga Bandung. Kafé Kampring ieu teh salah sahiji kafé nu baris dibuka di sabudeureun Jalan Karawitan, nu ayeuna geus jadi salah sahiji jalan nu dituju pikeun jelema nu hayang kukulinéran di Bandung.
Dina acara ieu, Kafé Kampring ogé nepikeun rasa sukur jeung ngahaturkeun nuhun ka Gusti nu Agung, ka sadaya sadérék sareng komponén nu hadir ilubiung ngabantuan prosés ngarintis ti mimiti nepikeun ka ayeuna ngajugjug pamukaan Kafé ieu, ku babagi kabagjaan ka sasama. Acara ieu lumangsung haneut pinuh tur ramé ku hadirna barudak ti Panti Asuhan Taman Harapan Muhammadiyah.
Kafé Kampring oge miharep jeung midu’a kalayan bisa jadi tempat nu hade, mangpaat, barokah jeung nu utama nyieun nu daratang ka Kafé ieu leuwih produktif. Naha leuwih produktif?
Kafé Kampring nyaéta hiji kafé sakaligus workspace pikeun nongkrong atanapi santéy bareng babaturan nu ayeuna keur up to date di sabudeureun Buahbatu, Bandung. Konsépna nu imahan ala-ala Sunda, basajan, minimalis, ditambahan ku kulinér khas Bandung nu ngeunah, dipiharep bisa merenah keur sakabéh kalangan.
Workspace di dieu dihartikeun salaku tempat nu merenah dipaké pikeun ngabéréskeun pagawéan, boh keur aktifitas rapat atanapi aktifitas pagawéan nu séjénna. Kampring ogé dijadikeun salaku tempat amprok jeung babagi pangalaman jeung jelema-jelema anyar.
Kafé Kampring miboga rohangan nu sifatna indoor jeung outdoor. Nu daratang dibébaskeun pikeun milih tempat gumantung ka perenahan séwang-séwang. Di buruan hareup, aya hiji panggung nu bisa dipaké keur nyieun kontén kréatif, siga pagelaran musik, nongton bareng atanapi acara lianna.
Wilujeng Kamping!!
