BANDUNG (NYUNDAYU.COM), – Ratusan bobotoh Persib Bandung ti sababaraha organisasi, ngontrog Bandung Interactive Hub (BIH), di Cafe Kampring, Jl. Maskumambang 39 Bandung. Maranéhna jadi bagéan tina event nonton bareng (nobar) laga Persib versus Bali United.
Adu laga Persib jeung Bali United di minggu ka-23 Liga 1 2023-2024 lumangsung di Stadion Kapten I Wayan Dapta, Bali, Senén peuting (18/12), ku hasil imbang tanpa gol alias 0-0.
Nu hadir dina acara nobar nyaéta mantan pamaén Persib, Robby Darwis, aktor Joe P. Project sarta insiator BIH Balad Uwa Mahfud, Iwan Setiawan.
Robby miharep Persib ngamankeun poin di kandang Bali United. “Persib ayeuna ieu aya dina kondisi ngahariwangkeun, tong dugi nguciwakeun bobotoh. Kedah aya strategi nu saé. Palatih kedah tiasa nganalisis,” ceuk Robby.
Samentara éta, Iwan Setiawan nyebutkeun, BIH dijieun pikeun jadi wahana dialog, hususna pikeun kaun milénials jeung Gen Z, pikeun miéksprési. “Nobar mung salah sahiji tina seueurna event nu ku urang sadaya gelar. Di tempat ieu aya layanan konsultasi hukum gratis, ngadamel podcast kanggo cawapres Prof. Mahfud sareng nu sanesna. Tempat ieu dibuka kanggo umum, utamina kaum nonoman, supados tiasa ngabagi sadaya informasi.”
Inyana miharep kaum nonoman teu tabu ngobrol politik, sarta open minded, nepika inyana bisa nganalisis kajadian ku akal sehat. “Kaum nonoman nyaéta masa depan bangsa ieu. Tong apatis, tong kaheurap ku jogéd-jogéd nu tambelar kana ide jeung gagasan,” ceuk Iwan nu ogé alumnus FH Unpad’87 ieu.**
Éditor: Dadan Hendaya
Robby Darwis basa ngilu nobar Persib-Bali United di Bandung Interactive Hub. Jl. Maskumambang 39, Senen peuting (18/12). (Foto: Istiméwa)
