BANDUNG (NYUNDAYU). – Aya hiji pasangan nu boga untung ku manggihan salah sahiji ‘panimuan arkéologis panggedéna’ di Inggris, nyaéta tumpukan 264 koin emas nu luar biasa, asalna téh ti jaman pamaréntah Raja James I di handapeun téhel dapur maranéhna geus dijual di palélangan ku harga ampir £755.000 (leuwih ti Rp12,7 miliar).
Harta karun nu nyieun maranéhna jadi ngadadak beunghar éta kapanggih dina hiji cangkir nu kakubur. Éta ku maranéhna kapanggih basa ngabéréskeun téhel dapur imah. Ratusan koin emas éta umurna sakitar 400-an taun jeung aya ngan genep inci di handapeun beton di properti abad ka-18 di Ellerby, North Yorkshine.
Pasangan—nu hayang tetep anonim—pamanggih harta karun éta reuwaseun, mimitina nyangka tumpukan éta téh kabel listrik. Tapi basa diangkat ku maranéhna, ari pék téh aya koin dina cangkir garabah saukuran kaléng Coca-Cola.
Koin emas éta – sababaraha di antarana umurna leuwih ti 400 taun, asalna ti taun 1610-1727, nu hartina nutupan jaman pamaréntahan James I, Charles I nu diéksékusi, jeung Raja George I – geus ditunda dina cangkir garabah nu kalapis uyah salila sakitar tilu abad.
Terus pasangan éta ngontak balai lélang London Spink & Son. Terus, saurang ahli datang ka properti maranéhna pikeun ngaévaluasi tumpukan harta karun éta. Koin-koin kuno éta dilacak jadi nu kungsi dipiboga ku kulawarga padagang nu beunghar jeung boga pangaruh ti Hull, Fernley-Maisters.
Kulawarga Maister nyaéta importir jeung éksportir bijih beusi, kai jeung batu bara jeung generasi saterusna ngajabat jadi politisi Whig jeung Anggota Parlemén mimiti 1700-an.
Koin-koin éta dikumpulkeun dina mangsa hirup Joseph Femley jeung istrina Sarah Maister. Ceuk Gregory Edmund, ti palélang London Spink & Son: “Prosés jual beuli éta unik dina rupi-rupi hal. Carita koin, metode panimuan, sareng kasempetan langka kanggo mésérna ti palélangan.”
“Nu mésér seueur pisan ti sakuliah dunya kanggo babagi dina carita Sarah sareng Joseph Fernley sareng hak istiméwa kanggo ngagaduhan sabagéan tina harta aranjeunna,” pokna, kawas nu dikutip Metro.co.uk, Senén (10/10/2022). “Abdi teu acan kungsi ningali réspon ka lélang sapertos kitu sateuacanna, hasilna ngabuktoskeun.” “Para panimu nu hoyong tetep anonim reuwaseun pisan ku hasilna. Éta ngaalitkeun harepan nu atos aya sateuacanna,” pokna deui.
Sumber: internasional.sindonews.com
Foto: Spink/DNBS
