BANDUNG (NYUNDAYU.COM), – Para alumni SMA Negeri Bandung ti era 60-70an, nyaéta ti SMAN 1, 2, 3, 4, 5 jeung 6, bakal ngagelar acara Pekan Olah Raga Intra SMAN Bandung (PORISMAN) ka-11, di bulan November atawa Desember 2024 ieu.
Éta hartina, para alumni nu eusina aki-aki jeung nini-nini nu umurna minimal 60 taun, baris ngumpul ngawangun silaturahmi, sabari ngadu kabisa dina pasanggiri opat rupa olahraga, nyaéta maén bal, volley, baskét jeung ténis méja.
“Ieu baris ramé pisan, kumargi para aki jeung nini nu kantos ngora jeung jaya di masana, baris tampil jeung tandang dina opat rupi olahraga ieu,” ceuk Ketua Umum IKA SMAN (Pasman) 4 Bandung, Iwan Setiawan, ka média, di Bandung, Salasa (9/1).
Nepika danget ieu, ceuk inyana, komunikasi jeung silaturahmi para pamilon PORISMAN kajaga dalit kénéh, buktina nepika taun 2023 geus kalaksana Reuni PORISMAN ka-10. “Hartosna parantos 10 taun diayakeun evént réuni sareng silaturahmi ku ngusung acara Spirit PORISMAN nu mertandingkeun olahraga nu sami sareng PORISMAN kapungkur, nyaéta maén bal, volley, baskét sareng ténis méja. Ayeuna ditambihan ku sababaraha cabang olahraga nu janten eksibisi, di antarana, gateball, ténis, golf sareng gowés,” pok Iwan.
Taun 2024 ieu, giliran Alumni SMAN 4 Bandung nu jadi Tuan Rumah Spirit PORISMAN XI.
Basa audiensi bareng Dispora Jabar jeung kunjungan ka Komplek Olah Raga Arcamanik (9/1), hadir Ketua Umum Pasman 4 Bandung, Ketua Panpel Wawan Juniwan, jeung Chief de Mission Smanop Gina Nandasari, nu ditarima ku Kabid Sarpras Dispora Jabar, H. Embun Pragnyamartha, MM.
Numutkeun Iwan, pihakna kudu bisa jadi tuan rumah nu suksés, boh suksés palaksanaan boh suksés préstasi. Ku kituna, pihakna daria pisan ngagarap evént ieu, kulantaran salian jadi ajang silaturahmi ogé jadi ajang nu miboga géngsi. Inyana miharep meunang support ti stakeholder jeung gawé bareng ti pihak sponsor.
Saluyu jeung Iwan, Ketua Panpel Spirit PORISMAN XI Wawan Juniwan negeskeun, ayeuna ieu geus mimiti ngalakukeun sababaraha persiapan, di antarana nyiapkeun venue nu bakal dipaké. Komplék Olah Raga Arcamanik répréséntatif pisan pikeun acara nu rencanana bakal digelar dina médio November-Desember 2024 ieu (sabérés Pemilu réngsé).**
Éditor : Dadan Hendaya.
