*Katerangan Gambar: Diskusi ngeunaan “Membaca Arah KIB Menjelang 2024”, ngahadirkeun para Ketua Parpol.
BANDUNG (NYUNDAYU). – Koalisi Indonesia Bersatu (KIB) nyaéta koalisi nu mentingkeun ide jeung gagasan, ambéh Indonésia asup kana jajaran nagara maju di dunya. Komo deui dina periode 2025 nepika 2035 kahareup, Indonésia bakal meunang bonus démografi, ku lobana usia produktif pangbadagna sapanjang sajarah nagri ieu.
“Urang sadaya kedah yakin, tuwuhna ékonomi tiasa dugika 7% dina kurun waktos éta,” ceuk Ketua DPD Partai Golkar Jabar, H Tb Ace Hasan Syadzily, dina diskusi nu digelar PWI Jabar, nu judulna “Membaca Arah Koalisi Indonesia Bersatu (KIB) Menjelang 2024”, di Cafe Kapulaga, Jl. Dayang Sumbi Bandung, Jumaah (30/9)
Salian ti Ace, hadir oge salaku narasumber, Pj. Ketua DPW PPP Jabar H Pepep Saepul Hidayat, Sekretaris DPW PAN Jabar M. Hasballah jeung pengamat pulitik Unpad, Firman Manan.
Pikeun ngajawab tangtangan bonus démografi éta, émboh Ace, dibutuhkeun pamingpin téknokratif. “Urang sadaya teu peryogi pamingpin nu gagayaan, ngaraos ageung di médsos,” émbohna.
KIB ogé ngainisiasi Program Akselerasi Transformasi Ekonomi Nasional atawa PATEN. “Kanggo maju, teu tiasa mung ku bisnis as usual. Urang oge kedah mayunkeun visi 3 S: séhat manusa, séhat ékonomi, séhat bumi,” tandes Wakil Ketua Komisi VIII DPR RI ieu.
Disebutkeun, aya 5 C tangtangan nu disanghareupan global, nyaéta Covid-19, Conflict (antarnagara), Climate Change, Commodity Prices (Fluktuasi Harga), jeung Cost of Living. Sakabeh éta, ngutip tina statemen Sri Mulyani, bakal nyieun angkeub ékonomi dunya, nyaéta di taun 2023 bakal nyanghareupan resési ékonomi.
“Urang réspon éta ku 5 B: bersatu, bertransformasi, bekerja, berdoa jeung berkarya teras-terasan,” ceuk Ace.**
Éditor: Dadan Hendaya
