BANDUNG (NYUNDAYU.COM), – Lobana pamasalahan nu aya di Jabar kudu diungkulan ku rarancang nu asak jeung panyusunan skala prioritas. Tong nepika aya pangwangunan nu dumasar kana pamikiran pamaréntah wungkul jeung ngaleungitkeun kabutuhan rahayat nu saenyana.
“Obésitas problematikan di Jabar ieu hayu diréngsékeun sasarengan, damel ‘GBHN’ versi Jabar. Tong dugika diwangun alun-alun, padahal saleresna warga ngaraos teu meryogikeun hal éta,” ceuk kandidat Gubernur Jabar nu oge Ketua DPD PDI Perjuangan Jabar Ono Surono.
Hal éta diungkabkeun basa inyana jadi narasumber dina serial diskusi pilkada “Mencari Pemimpin Pilihan Rakyat”, nu diinisiasi Jaringan Media Siber Indonesia (JMSI) Jabar jeung PW Muhammadiyah Jabar, Saptu (3/8).
Biantara Ono Surono ogé dibahas ku dua panelis, ahli pulitik Unpad Dr. Firman Manan jeung Sekretaris JMSI Jabar Dadan Hendaya. Serial diskusi ieu geus asup minggu kalima, ku ngahadirkeun kandidat gubernur, bupati jeung walikota nu poténsial. Minggu hareup, diskusi ngararancang baris ngahadirkeun Haru Suandharu, kandidat Gubernur Jabar ti PKS.
Anggota Komisi IV DPR RI ieu prihatin, provinsi nu jumlah populasi panglobana sakaligus penyangga kota mégapolitan Jakarta ieu, miboga sagudang pasualan. “Urang aya kénéh 18 kabupatén kota ku populasi kamiskinan luhur atawa ékstrim. Hartosna, aya kénéh 1 kulawarga nu panghasilannana teu langkung ti Rp1,4 juta sabulan. Teras pangangguran nu jumlahna 2 juta urang, nu sabagéan ageung nyaéta angkatan kerja,” pokna.
“Teu acan pabrik-pabrik nu di Jabar oge seueur nu ngalih ka Jateng, nu ngadamel nambihna jumlah pangangguran di dieu. Teras aya ti sisi palayanan kaséhatan, tina 27 kabupatén kota, RS répréséntatif nu mampuh ngalandongan panyawat beurat anyar di Bandung, nyaéta RSHS. Samentara éta, Jabar oge gaduh masalah dina sikap intoléran. Urang masih lumayan luhur angka intoléransina, mangrupi panutupan tempat ibadah agama sanés atanapi kelompok masarakat nu sanés,” ceuk lalaki nu remen disebut jiga aktor Keanu Reeves dina film John Wick ieu.
Ku mangrupa-rupa problematika ieu, Pemprov Jabar kudu daria niténan balanja APBD-na nu “ngan” Rp29 triliun. “Upami disungkeun nyusun skala prioritas, abdi bade fokus dina pasualan ékonomi. Pangwangunan infrastruktur kedah berbasis kabutuhan masarakat padesaan nu produksina kedah saénggalna dugi ka pakotaan atanapi daérah sanés. Kitu oge industri kréatif kedah ditanjeurkeun, sareng éta sanés ngan kawates dina aplikasi atanapi game wungkul. Upami patani mampuh nganggo téknologi nyebarkeun pupuk ku drone, éta atos kréatif. Tukang kebon tos nganggo é-commerce kanggo masarkeun bungbuahan, éta lebet ékonomi kréatif,” ceuk Ono.**
Éditor: Dadan Hendaya
