BANDUNG (NYUNDAYU.COM) – Gubernur Jabar hadéna leuwih mindeng diuk babarengan jeung para bupati jeung walikota, pikeun ngarumuskeun prioritas pangwangunan di daérah. Kulantaran Gubernur mah hakékatna teu miboga wewengkon, ngan miboga peran strategis nu bisa nyambungkeun kapentingan daérah jeung pamaréntah pusat.
“Gubernur téh kudu sering ngawangkong sareng bupati sareng walikota, kanggo ngabahas mana program nu kedah dipayunkeun. Réalitana, salami 15 taun ka pengker, (kenging bantosan ti Gubernur) sapertos loteré wé. Gumantung kumaha lobina,” ceuk kandidat Gubernur Jabar Dr. Bima Arya.
Hal éta diungkabkeun basa jadi narasumber dian serial diskusi pilkada nu judulna “Mencari Pemimpin PIlihan Rakyat,” nu diinisiasi Jaringan Media Siber Indonesia (JMSI) Jabar jeung PW Muhammadiyah Jabar, Minggu (7/7).
Biantara Bima Arya éta terus dibahas ku tilu panelis, nyaéta Dr. Affan Sulaeman, pengamat pulitik Unpad Dr. Firman Manan jeung Déwan Pakar ICMI Dr. Muslim Mufty. Serial diskusi ieu tutas asup minggu katilu, ku ngahadirkeun para kandidat gubernur, bupati jeung walikota poténsial. Minggu hareup, diskusi baris ngahadirkeun Prof. Dr. Ilham Habibie.
“Kadangkala dana anggaran provinsi tiasa turun dumasar kana caketna sareng gubernur. Aya kabupatén nu kenging ratusan milyar, samentawis kabupatén sanés zonk. Padahal mah pami calik sasarengan mah baris tiasa kapendak mana daérah nu leres-leres meryogikeun,” ceuk Bima nu oge urut Walikota Bogor ieu.
Kota Bogor teu kungsi nepika meunang zonk. Ngan oge teu kungsi ngalaman meunang angka nu fantastis. “Aya di tengah-tengah lah, sareng éta oge kumargi urang ngamaksimalkeun ngalangkungan komunikasi sareng DPRD. Hubungan personal sareng gubernur oge dijalankeun, mung éta oge teu acan masihan jaminan kapastian. Pa Ridwan Kamil parantos saé, mung sistemna teu acan kawangun. Teu aya forum calik sasarengan kanggo debat perkawis prioritas pangwangunan. Diskusi ieu supados ngaminimalisir rohang abu-abu.” jelas Bima nu ngamimitian karir jadi akademisi jeung pengamat pulitik satacan ancrub ka dunya pulitik.**
Éditor: Dadan Hendaya
