BANDUNG (NYUNDAYU.COM), – Dua kali gagal dina prosés pamilihan, nyaéta Pemilihan Bupati Bandung di taun 2020 jeung Pamilihan Legislatif taun 2024, teu nyieun Yena Iskandar Ma’soem neukteuk méré anggeus. Malah mah ayeuna inyana ngawahan ilubiung dina Pilwalkot Bandung.
Loba pihak nu nyangcayakeun Yena bakal nyangking tiket pikeun jadi bakal calon, malah mah aya politisi nu satengah nanya, “Saha nu ngajongklokkeun Bu Yena maju Pilwalkot.” Ngajawab hal ieu, Yena ngedalkeun, “Teu aya saurang ogé nu ngajongklokkeun. Abdi masihan kénéh kasempetan kanggo diri abdi pikeun bajoang.”
Hal ieu diungkabkeun ku inyana basa jadi narasumber dina Serial Diskusi Pilkada nu judulna Mencari Pemimpin Pilihan Rakyat, Ahad (30/6). Diskusi nu diinisiasi ku Jaringan Media SIber Indonesia (JMSI) Jabar gawé bareng jeung PW Muhammadiyah Jabar
Kandidat Walikota Bandung Hj. Yena Ma’soem difoto babarengan jeung para panelis sarta panitia satutas Diskusi Pilkada JMSI Jabar. (Foto: Istiméwa)
Barengan jeung Yena, hadir ogé pangamat pulitik Unpad Dr. Idil Akbar jeung anggota Majelis PW Muhammadiyah Jabar nu ogé saurang dosén UIN Dr. Luqmanul Hakim. Serial Diskusi Pilkada digelar saminggu sakali, ku ngahadirkeun kandidat Gubernur, Bupati jeung Walikota, nu saterusna dibahas ku para ahli atanapi tokoh.
“Ayeuna abdi mung ngiringan prosésna ku ngiring konvensi PDI Perjuangan. Urang sadayana ngantos ka saha tikét dipasihkeunna. Abdi yakin PDI Perjuangan baris mutuskeun saha nu pangsaéna kanggo rahayat Kota Bandung,” ceuk Ketua Ikatan Apoteker Indonesia Kota Bandung ieu.
Nu jelas mah, émbohna, kagagalan dina dua prosés pamilihan satacanna, dijadikeun pangalaman nu penting pikeun pajoangan ka hareupna. “Ieu sanés syahwat pulitik, nanging hoyong nyobi ngabdikeun diri kanu langkung ageung deui upami janten pingpinan di Pemkot Bandung.”
Idil Akbar jadi nu ngritisi pisan léngkah Yena nyalonkeun diri. “Kunaon Téh Yena wantun majeng? Naha teu kapok? Peryogi effort, peryogi artos, naha wantun? Teras naon waé léngkah stratégi Téh Yena kanggo kenging di Kota Bandung?” pokna satengah nanya.
Dina momen sapertos ayeuna ieu, Idil neruskeun, alusna mah Yéna konséntrasi pikeun nyangking tikét ti PDI Perjuangan. “Janten di dinya heula fokusna, supados teu hambur kaluar énérgi pami langsung tarung di lapangan,” ceuk Idil.
Samentara éta Hakim nyarankeun méh Yena —siga halna Muhammadiyah— fokus kana atikan, kaséhatan jeung palayanan masarakat. Kulantaran katilu hal ieu anu dibutuhkeun pisan ku warga Kota Bandung.**
Éditor: Dadan Hendaya
