BANDUNG (NYUNDAYU.COM), – Walikota Bandung kahareup ulah kajebak dina hal-hal anu téknis. Saenyana pamingpin kudu mampuh méré solusi kana masalah kamacétan, sampah atanapi sareukseukna PKL, ngan tong ngapilainkeun hal filosofis kamekaran budaya jeung paradaban.
Kitu nu diungkabkeun kandidat Walikota Bandung Arfi Rafnialdi, basa jadi narasumber dina Serial Diskusi Pilkada 2024 nu miboga topik “Néang Pamingpin Pilihan Rahayat”, di Sékrétariat JMSI Jabar, nu ogé kantor Nyundayu.com, Jl. Maskumambang No. 39 Bandung.
Acara nu diinisiasi Jaringan Media Siber Indonesia (JMSI) Jabar ieu dipigawé bareng jeung PW Muhammadiyah Jabar, Perhimpunan Indonesia Tionghoa (INTI) sarta Kadin Jabar. Diskusi baris lumangsung unggal Minggu sonten, nepika awal November ieu.
“Kamekaran niléy adab sareng budaya sering pisan teu diperhatoskeun ku para pamingpin. Padahal abdi yakin, adab éta kedah mayunan élmu. Kumargi pangwangunan sakedahna miakar tina budaya sareng idéntitas wargana,” ceuk Arfi nu narima surat tugas ti DPP Partai Golkar pikeun nyangking dukungan salaku Calon Walikota Bandung.
Sagigireun éta, Ketua INTI Jabar Leon Hanafi nyebutkeun yén Kota Bandung ngabutuhkeun pamingpin nu miboga visi budaya jeung ékonomi nu mumpuni. “Urang sadaya ti étnis Tionghoa teu ngamasalahkeun saha oge nu bade janten pamingpin di Kota Bandung, ti partai mana waé, ti étnis mana wae. Mung ngan palay hirup tartib, aman, damai jeung tiasa usaha milari nafkah kalayan tenang, sabari hirup babarengan sareng étnis nu mana waé,” pokna
Kasebutkeun, pamingpin nu hadé teh teu ngan sakadar mampuh ngaladénan masarakat. “Ngaladénan wungkul teu cekap. Malah mah tong dugi ka ngaladénan nu ngan janten parasite ngan miharep bantuan jeung proyék. Tong dugika masarakat janten ogoan. Jantenkeun masarakat nu produktif sacara ékonomi, miboga budaya jeung adab.”
“Urang sadaya kedah ngagaduhan akar budaya nu kuat. Pamingpin téh kedah tiasa ngarawat akar kaadaban. Upami paradaban reksak, sadayana reksak. Upami masarakat teu miboga adab, éta tanda pamingpin nu gagal. Salami ieu pamingpin di Kota Bandung teu ngarawat. Budaya Sunda tambih kasingkirkeun,” tandesna.
Samentara éta, Sékrétaris PW Muhammadiyah Iu Rusliana, nyorot kana panungkulan PKL nu tacan optimal di Kota Bandung, ku kituna miharep aya Walikota nu concern ngungkulan ha lieu.
“Para PKL muhun sareukseuk, sumber kakumuhan. Mung aranjeunna ogé manusa-manusia nu kedah diberdayakeun, dipasihan rohang kanggo mekarkeun usahana. Tong dugika aranjeunna mung diudag-udag kanggo ditertibkeun, namung urusan patuanganna teu dipaliré,” ceuk Iu.
Walikota nu datang, sambungna, kuduna mampuh nyieun konsép nu holistik nu ningkatkeun harkat jeung martabat PKL, tapi sakaligus ngajadikeun kota ieu bersih, tartib tur éndah.**
Éditor: Dadan Hendaya
