BANDUNG (NYUNDAYU), Salila dua peuting noron, ratusan nonoman kaum milenial minuhan Cafe Kampring, di Jl. Maskumambang 39 Bandung, Sabtu – Minggu (8-9/10). Pas dicukcruk, maranéhannana kairut pikeun hadir dina acara “NGAJAR” (Ngadawuh Ganjar) nu diinisiasi ku Relawan Ganjar Creativity (Ganjartivity).
Dina Sabtu, event ngobrol kreatif ieu ngadatangkeun Jamal (Preman Pensiun), samentara dina Minggu, giliran Joe (P-Project) jeung Yujeng Hensem nu shareing ide sual pamingpin masa depan.
Numutkeun Yujeng, Bandung tetep jadi barométer kréativitas seni daérah séjén. “Urang sadaya apal band-band nu malang mulintang di musik nasional, eta seueur lahir di dieu. Abdi percaya, ngalangkungan média diskusi nu digelar sukarélawan Ganjartivity, tiasa ngahasilkeun rupa-rupa ide nu kréatif ti kalangan pamuda,” tandes jajaka nu remen midang di acara komédi televisi ieu.
“Kedah aya creative space, boh éta palatihan. Mudah-mudahan para sukarélawan tiasa ngadamel palatihan-palatihan kanggo usia dini, usia 20, malahan kanggo seniorna. Janten panginten aya ruang kanggo urang sadaya ngaluarkeun kréativitas sapertos naon,” manéhna miharep.
Samentara éta, numutkeun Joe, para nonoman kudu meunangkeun pencerahan, ambéh engké teu salah milih Présidén RI. “Ti sadaya caprés nu aya, moal aya deui, mung Ganjar Pranowo nu kukitu konsisténna merhatorskeun seni jeung budaya. Abdi aya di garis pangpayunna nu ngadukung caprés nu perhatosan pisan ka seniman,” ceuk jebola jurusan Sejarah Unpad ieu.
“Abdi kataji para gen z sareng milenial antusias pisan ngiring kagiatan sapertos ieu, dugika ngabuka mindset aranjeunna kanggo janten kréator seni di Kota Bandung. Ambéh kamotivasi ogé para nonoman kanggo janten seniman pinunjuil di Kota Bandung,” tandesna.**
Éditor: Dadan Hendaya
