TASIKMALAYA (NYUNDAYU), – Anggota Komisi V DPRD Jabar, H. Yod Mintaraga ngarasa prihatin ku ayana musibah taneuh longsor nu kajadian di wilayah Ds. Cintawangi Kec. Karangnunggal Kab. Tasikmalaya, panungtungan minggu kamari.
Taneuh longsor nu luhurna kira-kira 200 metér jeung lega 75 metér éta, ngabalukarkeun imah panggung nu ukuranna 4×5 metér katimpah material taneuh jeung babatuan. Antukna, nu boga imah kabawa ku longsor jeung tiwas.
“Abdi ngadugikeun rasa bélasungkawa, kumargi pasutri nu parantos sepuh, nyaéta Ki Sajan (85) sareng Néné Darminah (83), ngantunkeun saatos kaurug material longsor,” ceuk Yod, nalika dikonték wartawan, Senén (12/9).
Inyana meredih ka masarakat sabudeur, pikeun waspada nalika turun hujan, kulantaran bisi kajadian deui longsor susulan. “Kamari éta leres inténsitas hujanna lumayan ageung. Sadinten sateuacan kajantenan dina waktos kinten-kinten tabuh 5 subuh, hujan turun ageung pisan ti siang dugika wengi,” émboh Ketua Depidar SOKSI Jawa Barat ieu.
Satacanna, anggota Fraksi Golkar ti Dapil Tasikmalaya ieu oge nepikeun pakét santunan pikeun masarakat nu kurang mampuh di Kel. Setiawangi kec. Tamansari. Kagiatan bagi-bagi sembako geus rutin diayakeun ku Yod, pikeun ngabantu warga.**
Éditor: Dadan Hendaya
