BANDUNG (NYUNDAYU), – Anggota Fraksi Partai Golongan Karya (Golkar) DPRD Provinsi Jawa Barat, Yod Mintaraga nepikeun pangbagéa ti fraksina pikeun Pemerintah Provinsi Jawa Barat nu nyangking deui opini Wajar Tanpa Pengecualian (WTP) ti Badan Pemeriksa Keuangan RI dina Laporan Keuangan Pemerintah Daerah Provinsi Jabar Taun Anggaran 2022.
“Fraksi Golkar ngadugikeun wilujeng ka Pemerintah Provinsi Jawa Barat kanggo disangkingna opini WTP ka-12 ti BPK RI,” ungkab Yod, di Bandung, Salasa (6/5/2023)
Pikeun hontalan opini WTP éta, teges Yod, Pemprov Jabar kudu mertahankeun dina taun-taun saterusna. Kulantaran teu bisa ditampik yén niléy pangluhurna ti BPK RI éta mangrupakeun hasil paéh poso nu sinérgis antara pamaréntah jeung législatif pakait manajemén kauangan nagara.
“Urang sadaya salaku législatif mung ngajalankeun tugas sareng fungsi sakumaha kedahna, nyaéta pangawasan, régulasi, sareng budgeting ka pamaréntah. Sareng hasil paniléyan BPK nyatana Opini WTP. Ku kituna kedah dipertahankeun kanggo taun salajengna,” ungkab Yod.
DPRD Jabar ogé geus ngabandungan wawaran ti BPK RI wawakil Jawa Barat pakait disangkingna opini WTP ka-12 éta, dina agénda rapat di DPRD Jabar dina Salasa 16 Mei 2023.
Pakait jeung éta, Gubernur Jawa Barat Ridwan Kamil nyebutkeun yén disangkingna opini WTP nandakeun yén pangwangunan di Jabar salawasna akuntabel jeung transparan.
“Alhamdulillah wartos nu ngabagéakeun Jawa Barat nyangking deui Opini WTP nandakeun ka-12 kali hiji hal nu saé teras urang pertahankeun. Ieu ogé nandakeun pangwangunan Jawa Barat salami lima taun kapengker salawasna dina koridor transparan sareng akuntabel dugika sadayana karaos mangpaatna ku masarakat,” ceuk Ridwan Kamil satutas Rapat Paripurna di Gedung DPRD Provinsi Jabar, Kota Bandung, Senen (15/5/2023)
Inyana miharep aprésiasi Opini WTP ieu jadi tradisi positif dina ngawangun Jabar nepika jadi motivasi pikeun nyadiakeun layanan nu maksimal ka masarakat.
Samentara Kepala BPK RI Perwakilan Jabar Paula Henry Simatupang nepikeun, Opini WTP laksana dihontal ku Pémprov Jabar lantaran laporan kauangan nu dipidangkeun geus minuhan standar akuntansi pamaréntahan.
“Wilujeng ka Pémdaprov Jabar nu parantos nyangking Opini WTP ka-12 ti BPK RI. Opini ieu nandakeun yén pidangan laporan kauangan nu dipidangkeun parantos minuhan standar akuntansi pamaréntahan, saluyu sareng paraturan nu aya dina undang-undang, teras désain sareng impléméntasi sistem éféktif sareng aya kacekapan,” ceuk Paula Henry.
Inyana ngarepkeun ku aprésiasi Opini WTP ka-12 kali ieu bisa ngastimulus kinerja Pémdaprov Jabar kahareupna leuwih akuntabel jeung transparan.**
Éditor: Dadan Hendaya
