BANDUNG (NYUNDAYU), – Wakil Ketua DPD Partai Golkar Jabar Bidang Organisasi, H. Yod Mintaraga ngulu marengan Ketua DPD Partai Golkar Jabar H. Tb. Ace Hasan Syadzily, ngadaftarkeun 120 calon anggota législatif (Caleg) DPRD Jabar ka KPU Jabar, Juma’ah, (12/5).
Teu ngan nganteurkeun rekan-rekan sajawat di partaina pikeun daftar jadi caleg, Yod sorangan ogé asup din adaftar caleg ti Daerah Pemilihan Kota/Kab. Tasikmalaya.
Lamun anggota Komisi V DPRD Jabar ieu kapilih deui dina Pileg 2024 engkin, hartina Yod bakal jadi anggota Dewan nu kadalapan kalina, salah sahiji politisi Golkar ku waktu pangabdian pang panjangna di korsi législatif.
“Insya Allah abdi optimis baris dipercanten deui ku warga Tasikmalaya kanggo calik di korsi DPRD Jabar. Sami halna abdi optimis Golkar baris mampuh ngahontal langkung ti 20% suanten, sakantenan janten nu pinunjul dina Pemilu di Jabar,” ceuk Yod, basa dikonték wartawan Saptu (13/5).
Optimisme éta lain taya cukang lantaran, “Gubernur Jabar Ridwan Kamil atos nganggo acuk konéng, pangurus sareng kader ayeuna nuju solid-solidna, kualitas para caleg oge mumpuni, janten teu aya alesan urang sadaya kawon pemilu,” teges Ketua SOKSI Depidar Jabar ieu.
“Abdi ngajak warga masarakat ngajantenkeun Pemilu 2024, boh éta Pileg, PIlpres atanapi Pilkada, janten momentum kanggo milih jalmi-jaimi nu pangsaéna kanggo calik di éksékutif sareng législatif. Ulah mésér ucing dina lebet karung, pilih partai nu parantos kajajal aktivitas sareng pangabdianna sarta karyana di tengah masarakat,” tandes Yod.**
Éditor: Dadan Hendaya
