BANDUNG (NYUNDAYU), – Wakil Ketua Pansus I LKPJ DPRD Jabar H. Yod Mintaraga ngedalkeun yén LKPJ mengrupakeun ukuran kinerja Gubernur Jawa Barat dina ngahontal targét nu geus sapuk jeung DPRD Jabar liwat RPJMD jeung RKPD. Satacan ngalaksanakeun tugasna, gubernur jeung DPRD nandatangan RPJMD (Rancangan Pembangunan Jangka Menengah Daerah) jeung RKPD (Rancangan Kerja Pemerintah Daerah).
“LKPJ ieu ukuranna kinerja Gubernur kana hontalan targét nu parantos sapuk sareng DPRD Jabar RPJMD sareng RKPD nu dibiayaan unggal taunna ku APBD Jawa Barat,” ceuk Yod Mintaraga liwat jaringan Whatsapp, Senén (10/4/2023).
“Hal-hal naon waé nu parantos dihontal sareng nu teu acan kahontal di antara waktos 2022 sareng pasualan nu kajantenan sarta ikhtiar ka payunna sapertos naon,” ceuk Yod.
Numutkeun anjeunna Pansus baris ngabahas sareng ngakritisi sacara konstruktif jeung nepikeun rékomendasi ka Gubernur Jabar pikeun bebenah ka hareupna. Satacan dibahas di Pansus I LKPJ, pokna, LKPJ Gubernur Jabar taun 2022 éta geus dibahas saméméhna di komisi-komisi saluyu jeung mitra kerja séwang-séwang.
“Sareng hasilna tos lebet ka komisi ngalangkungan pingpinan DPRD Jabar,” émbohna.
Yoh nambahan, kajian samentara tina LKPJ ieu eusina salian ti hontalan-hontalan, ogé ditepikeun hal-hal nu tacan kalaksana. “Taun kamari LKPJ éta hasilna lumayan nyugemakeun hususna pakait Kinerja Gubernur Jawa Barat. Teras taun 2022 sapertos naon, urang tingal engkin hasil pembahasan pansus. Mugia nyugemakeun,” émboh Yod.**
Éditor: Dadan Hendaya
