BANDUNG (NYUNDAYU), – Musibah banjir jeung longsor kajadian deui di sajumlah titik di wilayah kidul Bandung, paska hujan badag nu ngaguyur wilayah éta ti Rebo nepika Kemis (23/3).
“Hujan ageung nu ngaguyur ti Rebo wengi dugika Kemis enjing, ngabalukarkeun Walungan Citarum sareng sababaraha wahangan mudal di wilayah Kabupatén Bandung, dugika nyababkeun banjir, longsor, sareng bumi rugrug,” ceuk Kepala Pelaksana BPBD Kabupatén Bandung Uka Suska, Kemis (23/3).
Lokasi nu katarajang banjir éta aya di Désa Buninagara jeung Désa Cilamé Sérang Kacamatan Kutawaringin, di Kompléks Cincin Permata Indah jeung Warung Lobak ku kaluhuran cai 20-160 cm, di Kacamatan Bojongsoang ku kaluhuran cai di Cijagra 30-40 cm jeung di Tegalluar nu luhur caina 20-30 cm.
Di lokasi séjén, Désa Tanggulun Kacamatan Ibun ku kaluhuran cai aya di 20-40 cm, Kampung Kaum Kacamatan Dayeuhkolot, Désa Rancamulya Kacamatan Pameungpeuk ku kaluhuran cai 120 cm.
Musibah éta oge kaalaman ku warga Désa Soréang Kacamatan Soréang ku kaluhuran cai 10-80 cm, terus Kacamatan Majalaya ku kaluhuran cai 40-100 cm, Kacamatan Balééndah saluhur 20 cm, sarta Desa Panajung Kacamatan Cangkuang.
Sanajan banjir saluhur 160 cm narajang sababaraha daérah, BPBD nyatetkeun yén masarakat tetep bertahan cicing di imah séwang-séwang, ku miboga harepan banjir bakal gancang surud.
“Janten teu acan aya pangungsi. Namung, urang rékap sareng urang salurkeun bantuan logistik kanggo korban nu kadampak,” pokna.
Aya ogé longsor nu kajadian di Désa Resmi Tinggal Kacamatan Kertasari, Désa Buninagara Kacamatan Kutawaringin, sarta lingkungan RT 06/RW 8 Kalurahan Jelekong Kacamatan Balééndah.
Longsor ogé narajang Désa Sukanagara Kacamatan Soréang, Désa Karamat Mulya Soréang, sarta di Jalan Raya Soréang-Ciwidéy. Kampung CIpicung Désa Sadu Kacamatan Soréang, Désa Cipinang, Désa Sukamaju Kacamatan Cimaung, ogé ngalaman longsor.
Wilayah séjénna, Désa CIlamé jeung Desa Sukamulya Kacamatan Kutawaringin, Kampung Pamoyanan jeung Kampung Cikitu Désa Cikitu Kacamatan Pacét, Désa Nengkelan Kacamatan Ciwidéy, Kampung Bojong Jambu RW 13, sarta 14 Desa Sukawening Kacamatan Ciwidéy.
“BPBD koordiasi sareng aparat satempat kanggo ngungkulan longsor éta, kalebet di jalan Soréang-Ciwidéy supados teu nganggu aktivitas masarakat nu sanés. Urang oge nyungkeun ka masarakat tetep waspada kumargi Walungan Citarum kapantau aya di lével awas. Sareng kondisi cuaca angkeub,” tandes Uka.**
Éditor: Dadan Hendaya
