BANDUNG (NYUNDAYU), – Kantor DPD Partai Golkar Jawa Barat, di Jalan Maskumambang nu biasa dieusi kader ku seragam khas warna konéng, ujug-ujug sapoé jeput dina Saptu (18/3), robah jadi warna beureum.
Pas ditalungtik, nyatana keur aya hajat Depidar SOKSI Jabar nu ngagelar Rakerda. Warna beureum émang geus lila jadi idéntitas jeung kareueus ormas pangadeg Golker ieu.
Teu kagok, meriahna acara ieu nambahan, ku kahadiran Waketum DPP Partai Golkar nu ogé Gubernur Jabar Ridwan Kamil. Hadir ogé Waketum Depinas SOKSI Agun Gunanjar, Ketua DPD Partai Golkar Jabar Ace Hasan Syadzily nu ngabuka resmi acara, sarta Ketua Depidar SOKSI Jabar Yod Mintaraga salaku tuan rumah.
“Urang sadaya nyiapkeun acara ieu ti ampir sasaih kamari ku asak pisan. Sadaya Depicab kota-kabupatén sa-Jabar ogé ngirim utusanna. Ngahaja didamel meriah sareng megah, supados janten eunteung siapna SOKSI mayunan taun pulitik,” ceuk Yod Mintaraga, nu diréndéngan Ketua SC Ade Firman Bokir jeung Ketua OC Cucu Sugyati, di antara acara.
Numutkeun Yod, SOKSI salaku bagéan integral Partai Golkar siap jadi pamangul kameunangan partai éta dina Pemilu 2024. “Kader SOKSI ti akar rumput parantos nyiapkeun rupa-rupa léngkah sareng stratégi kanggo ngabagéakeun kameunangan Partai Golkar dina kerangka kompetisi nu sehat,” ceuk anggota DPRD Jabar ieu.
Komo deui, Yod ngémbohan, kakuatan Partai Golkar Jabar nambahan ku ngagabungna Ridwan Kamil salaku Ketum Bidang Penggalangan Pemilih. “Ieu janten amunisi nu luar biasa kanggo urang sadaya, dugika percaya diri kanggo kompetisi sacara séhat merebutkeun simpati sareng sora rahayat.”
Dijelaskeun, Rakerda ieu bakal diteruskeun ku Rakercab di unggal kota jeung kabupatén, pikeun leuwih ngamantepkeun léngkah. Momentum 2024 baris dimaksimalkeun salaku taun kameunangan partai nu miboga lambang tangkal caringin ieu.**
Éditor: Dadan Hendaya
