BANDUNG (NYUNDAYU), – Depidar SOKSI Jawa Barat bakal ngagelar Rakerda dina poé Saptu, 18 Maret nu datang. Ieu bakal jadi Rakerda nu strategis, kulantaran keur aya di taun pulitik pikeun ngameunangkeun Partai Golkar dina Pemilu 2024.
“Minangka amanat organisasi, urang sadaya siap kanggo ngagelar Rakerda. Ieu ogé sakantenan wahana kanggo ngarapetkeun barisan, nyamikeun léngkah dina nyukséskeun pajoangan Partai Golkar,” ceuk Ketua Depidar SOKSI Jabar, H. Yod Mintaraga, di Sekretariat Jl. Matraman No. 6 Kota Bandung, Kemis (9/3)
Disebutkeun, loba kader SOKSI nu jadi caleg Partai Golkar. “Rakerda ieu ogé janten pembekalan pulitik, supados aranjeunna mampuh ngiprah aktif ngengingkeun partai sakantenan ngajantenkeun kader salaku anggota Déwan,” ceuk anggota Komisi V DPRD Jabar ieu.
Numutkeun Yod, Rakerda ieu penting pikeun konsolidasi aksi dina nyanghareupan Pemilu 2024. “Teu aya kecap iwal ti kenging kanggo Partai Golkar. Kumargi pemilu nu ayeuna baris ngabuka panto kanggo kasuksésan partai ka payunna.”
Samentara éta, Ketua SC Rakerda, Ade Firman Bokir, ngémbohan, Ketua DPD Partai Golkar H. Ace Hasan Syadzily baris nu ngabuka sacara resmi, sakaligus méré pangarahan.**
Éditor: Dadan Hendaya
