BANDUNG (NYUNDAYU), – Anggota Komisi V DPRD Jabar ménta kapangurusan KONI Jabar nu kakara dilantik saminggu ka tukang, pikeun bener-bener fokus kana misi mertahankeun gelar Juara Umum PON di Médan jeung Acéh di 2024.
“Urang sadaya tos dua kali noron juara PON, nyaéta di Jabar taun 2016 sareng di Papua taun 2021. Ayeuna pangurus ngagaduhan hajat nu abot hattrick Juara PON, sareng ieu kedah kapatri dina manah sadaya pangurus,” teges anggota Komisi V DPRD Jabar, H. Yod Mintaraga, ka Nyundayu, Kemis (9/3).
Kulantaran éta, KONI kudu ti awal nyiapkeun program pembinaan atlét dina nyanghareupan PON 2024. “Pembinaan para atlét penting kanggo ngahontal tujuan jangka panjang sareng ogé nyangking préstasi dina PON ka payun,” cek Ketua Depidar SOKSI Jabar ieu.
Numutkeun inyana, taya préstasi nu dihontal ku absénna pembinaan nu kontinyu jeung karencana. “Abdi yakin pangurus nu énggal nyaéta jalmi-jalmi nu paham dunya olahraga, apal cara ngabina para atlét kanggo ngaluarkeun kapasitas nu pangsaéna,” pok Yod nu ngawakilan Dapil 15 Kota jeung Kabupatén Tasikmalaya ti Partai Golkar.
Inyana miharep KONI Jabar teu kajongjonan ku dua kali gelar juara nu geus disangking. Komo ayeuna daérah lain pasti oge miboga kahayang nu kuat pikeun ngarebut gelar juara ti Jabar. Numutkeun inyana, KONI kudu terus nguatkeun rélasina jeung sakabéh stakeholder olahraga, kaasup Pemprov jeung DPRD Jabar.
Éditor: Dadan Hendaya
