BANDUNG (NYUNDAYU), – Sanajan Gubernur Jabar Ridwan Kamil geus ngajelaskeun ka Pengurus WIlayah Nahdlatul Ulama (PWNU) Jabar, pakait statemen dana APBN Rp1 triliun keur NU, Forum Komunikasi Ormas Jabar ngarasa éta tacan cukup.
“Seu’eur kénéh nu kedah dijéntrékeun, kumargi upami warga atanapi afiliasi NU nu kénging dana saageung éta, kumaha sareng ormas nu sanés. Kumargi éta, saluyu sareng kasapukan para pingpinan ormas Jabar di Sekretariat Pemuda Démokrat Indonésia Kota Bandung, urang sadaya nyungkeun hearing publik ka DPRD Jabar,” ceuk Koordinator Forum Komunikasi Ormas Jabar Yan Rizal, Kemis (5/1)
“Ieu peryogi pisan dipidamel, supados urang sadaya salaku bagéan ti warga Jabar kénging informasi langsung ti sumberna, naon nu didugikeun Gubernur éta leres, aya program bantosan saageung 1T kango warga NU ti APBD,” pokna.
Salian ti éta, Forkom Ormas ogé hayang mikanyaho leuwih detil pakait mékanisme jeung prosedur distribusi bantuan dana nu sumberna ti APBD. “Parantos merhatoskeun azas kaadilan nu proporsional kanggo sadaya stakeholder, janten teu aya nu diistiméwakeun dina distribusina,”
Ku kituna, Yan Rizal ménta DPRD pikeun ngajadualkeun iraha pastina hearing publik ieu bisa kalaksana, sakaligus ngajak komponén masarakat Jabar séjénna pikeun bisa hadir.**
Éditor: Dadan Hendaya
