DI awal taun 2000an, saha nonoman nu teu apal ka grup band Nineball? Band besutan sajumlah rumaja Bandung ieu kungsi nangkring di papan atas band-band Indonésia, bareng Dewa19, Sheila On 7 jeung Padi.
Lagu “Hingga Akhir Waktu” malah sababaraha bulan aya di puncak tangga lagu populér, sarta jadi soundtrack sinétron nge-hits di taun 2008. Taah, vokalisna nu miboga sora lemes, nyaéta Ray Shareza, weekend kamari hadir di Jl. Maskumambang 39 Bandung, kantor Nyundayu, nu sakaligus tempat nongkrong barudak ngora Kampring.
Sono kana sora emasna, Ray didaulat pikeun nyanyikeun lagu Hingga Akhir Waktu; kabeneran tiap weekend, di Kampring aya live music nu dipirig ku instrumén keyboard. Tangtu para tamu nu hadir oge ngarasa meunang surprise kulantaran bisa ngabandungan sacara langsung sora khasna Ray.
Tapi aya naon Ray hadir ka Kampring? “Kaleresan abdi diajak ku sobat nu biasa itikaf di masjid, Haji Nana, kanggo pendak sareng sobat lami nu tos icikibung di média, Kang Dadan. Alhamdulillah di dieu malah dipendakkeun sareng méntor politik, Kang Untung,” ceuk Ray nu oge kungsi cicing di Ngamprah Kab. Bandung Barat ieu.
“Abdi tos lami ngantunkeun dunya sélébritis sareng milih jalan da’wah. Sasakali nyanyi kénéh kanggo nyalurkeun hobi, sapertos di Kampring ayeuna. Mung waktos abdi ayeuna seueur diséépkeun kanggo neuleuman élmu agama, itikaf atanapi khuruj di mesjid-mesjid, boh di Indonésia ogé di sajumlah nagara sanésna,” ungkab Ray.
Awal inyana hijrah, nyaéta basa ngarasakeun kakosongan di tengah gurilapna dunya sélébritis. “Nyatana suksés di dunya ku gurilap raména katenaran, pangkat jabatan mah aya batasna sareng fana. Kasép samentara, ngora samentara, sohor samentara nu hiji dinten pasti ical. Ieu nu ngadamel abdi teras milari sareng milari kamana tujuan hirup abdi.”
H. Nana nu marengan Ray nyebutkeun, inyana ngarasa hélok aya vokalis band populér, bisa hijrah jeung terus konsistén niti jalan da’wah. “Unggal sasih Ray sok nyayogikeun tilu dinten kanggo linggih di lebet mesjid, ngaos, ngada’wah sareng nyebarkeun kasaéan ka jamaah sabudeur mesjid. Unggal taun ogé anjeunna sok ka luar negri kanggo nganjang ka mesjid-mesjid, milarian élmu ti para da’i nagara sahabat,” ceuk Ketua Ardin Jabar ieu.**
Éditor: Dadan Hendaya
Foto: Istiméwa
