BANDUNG (NYUNDAYU), – Ketua JMSI Jabar, Sony Fitrah Perizal, nepikeun rasa béla sungkawa ku ayana kajadian lini di sababaraha wewengkon di Jawa Barat, Senén (21/11).
“Belasungkawa ti kulawarga JMSI Jabar ku ayana musibah lini dina kakuatan 5,6 SR nu kaalaman ku wargi urang di Kabupatén Cianjur, Sukabumi, Kota Sukabumi, Bogor sareng Kota Bogor, Jawa Barat,” ceuk Sony.
Para pangurus JMSI Jabar keur koordinasi jeung sababaraha pihak pikeun bisa ngabantuan nungkulan sacara darurat para korban lini.
Sony ngajak sakabéh anggota JMSI Jabar pikeun nepikeun informasi di lapangan sabari ngutamakeun étika jurnalistik.
“Payunkeun informasi nu faktual sareng kavérifikasi. Pami teu tiasa ngiring ancrub ngabantos korban lini di lapangan,” pokna.
Lini nu numutkeun Badan Météorologi Klimatologi dan Géofisika (BMKG) pusatna di Cianjur, 10 km jero bumi kajadian siang ieu.
Sajumlah wangunan, kaasup padumukan, sakola, jeung gedong pamaréntahan ngalaman ruksak beurat. Dumasar informasi nu dikumpulkeun ti sababaraha sumber, samentara kacatet aya 20 urang tiwas jeung ratusan nu tatu.**
Éditor: Dadan Hendaya
Foto: canva.com
