BANDUNG (NYUNDAYU),- Teu jauh béda jeung fénoména nyéwa kabogoh nu ayeuna keur trénding di Indonésia, di nagara Inggris ogé aya bisnis nu sarupa. Ngan ieu mah nu diséwakeunna nyaéta salaki.
Saurang pamajikan di Inggris nyéwakeun salakina pikeun awéwé séjén pikeun ngalakukeun pagawéan imah. Harga séwana £40 atawa sakitar Rp714.000 sakali nyéwa. Bisnis nu langka ieu dijalankeun ku Laura Young (38), indung ku tilu budak ti Milton Keynes, Buckinghamshire, Inggris. Laura meunang idé bisnis éta ti podcast nu ngomongkeun ngeunaan saurang lalaki nu néangan rejeki tina ngawangun furnitur flat pack. Numutkeun Laura, layanan séwa salakina ayeuna geus pinuh dipesen salila mangminggu-minggu kahareup.
Dina Juni kamari, Laura nyieun iklan di Facebook jeung aplikasi Nextdoor, nginfokeun ngeunaan kabisa salakina; James, nu bisa sagala rupa, tina ngalukis, ngadékor, nepika masang téhel jeung karpét. Nyangkana Laura rék diseungseurikeun, nyatana James (42) kalahka boga klien kahijina dina sapoé, jeung gancang. Sanggeus éta, manéhna gawé genep poé saminggu ti jam 09.00 isuk-isuk nepika jam 20.00 peuting. Manéhna kapaksa nolak pagawéan séjén jeung ayeuna bisnis pamajikannana “Rent My Handy Husband” geus pinuh dipesen nepika pertengahan Novémber. Pagawéannana kaasup ngabantuan masang tipi, masang hordéng jeung ngawangun deui témbok imah. Manéhna ogé siap diséwa pikeun saha waé nu ngabutuhkeun bantuan. Samentara James nyanghareupan dina sisi tanaga pagawéan, Laura digawé ngajalankeun akun sosial jeung situs wéb.
Bisnis éta leuwih suksés tibatan nu dibayangkeun. Pasangan éta geus nambahan layanan anyar pikeun periode Natal, nawarkeun pamasangan lampu pésta, boh di jero atawa di luar rohangan.
“Abdi teu kantos ngarepkeun lepas landas sasuksés éta,” ceuk Laura, kawas dikutip express.co.uk, Kemis (3/11/2022). “Urang sadaya nembé ngajalankeun opat sasih, dugika kantos aya dina titik di mana aya seueur pisan padamelan nu dongkap janten James kedah didamel genep dinten saminggon. Urang kedah ngawitan nolak padamelan sareng ngirangan jam didamel, janten ayeuna mah ngan Senén dugika Jumaah, 09.00 énjing – 17.00 sonten,” pokna. “Urang duaan gaduh rencana pangwangunan [properti] nyalira nu malah mah teu acan dikawitan kumargi sibuk pisan. Urang ogé mesen padamelan munggaran pikeun sasih Januari.”
James kudu ngaleupaskeun pagawéannana di hiji gudang pikeun jadi tanaga pinuh waktu bareng Laura, ngarawat katilu budakna, dua di antarana autis. Bapa tilu budak ieu oge didiagnosis ku autisme opat taun katukang jeung bisa fokus dina hal-hal kawas konstruksi.
“Anjeunna leres-leres pinter ngadamelan hiji hal sareng teu paduli kana instruksina. Janten abdi ngémutan ieu bakal janten hiji hal nu tiasa ku anjeunna dilakukeun. James téh asalna sanés tina latar belakang perdagangan mung akina nyaéta saurang insinyur nuklir sareng aranjeunna ngémut nuju aya dina spektrum. Anjeunna gaduh pikiran nu métodis pisan sareng tiasa mikir di luar kotak. Anjeunna tiasa ningali hiji hal nu beda,” ceuk Laura. Dina sababara poé, pesen Facebook Laura pinuh ku jalma nu nanya ngeunaan hasil karya salakina.
Pasangan éta malah mah boga paméntaan séwa leuwih ti 150 mil jauhna.
Sumber: internasional.sindonews.com/Muhaimin
Foto: James Linsell-Clark/SWNS
