BANDUNG, (NYUNDAYU) – Kota Bandung nu kentel ku sajarahna, geus tangtu jadi surga pikeun saha waé nu mikacinta hal-hal nu pakait jeung sajarah.
Mimiti ti wangunan nepika rupa-rupa aksesoris nu aya ti puluhan taun ka tukang. Pikeun maranéh nu keur liburan di Bandung, wajib pisan datang ka Pasar Cikapundung ieu.
Lokasina aya di Jalan ABC Blok U-1, Braga, Sumurbandung, Kota Bandung. Di Pasar Cikapundung loba nu ngajual rupa-rupa barang antik jeung jadi surgana pikeun nu resep barang-barang vintage atawa rétro.
Cara panggampangna ka pasar ieu nyaéta ku manggihan tungtung Jalan Cikapundung Barat pahahareup jeung gedung urut Abdurahman bin Ra’uf Trade Center. Lamun geus di lantéy dasar, naék lift wéh ka lantéy 3.
Lamun geus di lantéy pangluhurna, pangunjung bakal ngaliwatan kios-kios padagang. Sanajan teu kabéh kios eusian, pangunjung kawas nu langsung dibawa ka jaman baheula ngan ku ningalian barang-barang antik nu dipajang.
Rupa-rupa barang nu kentel niléy sajarah bisa kapanggih di dieu. Mimiti ti barang pusaka titinggal karajaan Nusantara, keramik ti jaman dinasti Tiongkok, duit koin jaman baheula, kaméra taun 50-an nepika artéfak ti masa pamaréntah kolonial.
Tempat ieu téh dijadikeun tempat ngumpulna rupa-rupa aksesoris nu geus ngaliwatan sababaraha jaman.
Beuki kolot jeung langka, niléy barang-barang éta bakal beuki luhur. Tapi tangtuna hal éta lain masalah pikeun saurang koléktor.
Kisaran harga barang antik dibanderol mulai ti Rp100.000 nepika jutaan. Lain ngan koléktor, tapi budak ngora ogé jadi paminat ti barang-barang vintage nu aya di Pasar Cikapundung ieu.
Budak ngora mulai resep ku barang vintage lantaran trén ngoléksi barang vintage. Salah sahiji koléksi panglangkana nu aya di Cikapundung nyaéta foto asli Jalan Braga ti taun 1970-an. Salian éta, aya sababaraha koléksi perangko oténtik nu ngagambarkeun perjalanan sajarah bangsa Indonésia.
Sumber: bandungraya.inews.id/Rizal Fadillah
Foto: bandung.go.id
