*Katerangan Gambar: Para wartawan hadir dina acara diskusi “Membaca Arah Koalisi Indonesia Bersatu (KIB) Menjelang 2024”
BANDUNG (NYUNDAYU). – Koalisi Indonesia Bersatu (KIB) lain koalisi nu uduh ngan ngahaneutkeun suhu pulitik pikeun nyanghareupan Pemilu 2024. Katilu parpol mimiti ti tingkat pusat nepika akar rumput ngaupayakeun méh koalisi ieu tahan nepika Pilprés ka hareup.
“Abdi tiasa nyarios, dina sababaraha waktos ka payun, tiasa janten aya hiji-dua partai deui nu bade ngagabung dina koalisi ieu,” ceuk Ketua DPD Partai Golkar Jabar, H Tb Ace Hasal Syadzily, dina diskusi nu digelar PWI Jabar, nu judulna “Membaca Arah Koalisi Indonesia Bersatu (KIB) Menjelang 2024,” di Cafe Kapulaga, Jl. Dayang Sumbi Bandung, Jumaah (30/9).
Statemen Ace ieu, pikeun ngajawab kacangcayaan sabagéan kalangan, yén KIB bakal prématur jeung bubar satacan Pilpres jeung Pileg engké. Sajumlah jurnalis ogé nanyakeun hal éta, dina diskusi.
Hal nu sarua ogé diungkabkeun Sekretaris DPW Pan Jabar M. Hasballah. “Abdi kaleresan nembé pisan pendak Ketum PAN. Urang sadaya diskusi panjang, sareng yakin, KIB moal prématur,” pokna.
PAN yakin, babarengan jeung KIB ngajadikeun partai ieu jadi leuwih kuat. “Percanten, pami urang sadaya mapah séwang-séwang, urang sadaya bakal moal sakiat ayeuna. KIB moal baris ribut atanapi ngadikotomi figur caprés. Leres, yén figur téh penting, mung éta baris dipilih engkin.”
Pj. Ketua DPW PPP Pepep Saepul Hidayat nyebutkeun, KIB bakal mampuh tahan nepika Pemilu 2024 ka hareup. “Ieu pasualan komitmen sareng tanggeng waler. PPP terang pisan, KIB téh aya prosésna. Di handapeun urang sadaya teras ngawangun hubungan, komunikasi, silaturahmi, demi minuhan sarat solidna hiji koalisi. Badé teras tahan? Sing yakin, urang sadaya ngajaga, urang sadaya gaduh komitmen pikeun saling nguatkeun,” pokna.**
Éditor: Dadan Hendaya
