BANDUNG (NYUNDAYU). – Koalisi Indonesia Bersatu (KIB) nu diinisiasi tilu parpol —Partai Golkar, PAN jeung PPP— ngabentuk ku kasadaran babarengan, pikeun pemilu nu kahareup, tong katémbong deui aya pulitik idéntitas.
“Urang sadaya kedah nuntaskeun kaayaan polariasi nu seukeut, kumaha narasi cébong, kamprét, kadrun, kuat pisan ngabeulah masarakat. Kulantaran isyu nu dikapayunkeun nyaéta hal nu teu substansial. Mung langkung kana hiji hal nu sipatna simbolik, sareng teu aya gunana pikeun bangsa,” ceuk Ketua DPD Partai Golkar Jabar, H. Tb. Ace Hasan Syadzily.
Inyana nyebutkeun éta dina diskusi nu digelar PWI Jabar, nu judulna “Membaca Arah Koalisi Indonesia Bersatu (KIB) Menjelang 2024) di Cafe Kapulaga, Jl. Dayang Sumbi Bandung, Jumaah (30/9).
Salian ti Ace, hadir oge salaku narasumber, Pj. Ketua DPW PPP Jabar H Pepep Saepul Hidayat, Sekretaris DPW PAN Jabar M. Hasballah jeung pengamat pulitik Unpad, Firman Manan.
Naon nu dijual ku KIB, numutkeun Ace, nyaéta ide jeung gagasan. “Urang sadayana teu hoyong kajebak saha figurna, kulantaran urang sadaya palay nga-list heula naon waé pasualan stratégis nu dipayunan bangsa. Saatos éta nembé nyarios kritéria figur sapertos naon nu janten pamingpin kapayun,” émbohna.
Yén Partai Golkan geus nyebut ngaran Airlangga, terus PAN ogé “ngajual” Zulkifli Hasan, éta jadi kaputusan internal séwang-séwang parpol, jeung engké baris diputuskeun ku KIB saha figur nu bakal dikareupkeun.
Acé oge nangkis analisis sababaraha kalangan, yén KIB bakal bubar mun Ketua Umum DPP PPP Suharso Manoarfa diléngsérkeun. “Kedah dipikaterang yén Ketum DPP PPP ayeuna Pa Mardiono teh nyaéta LO (Liaison Officer) nu ti awal ngagodog dibentukna KIB. Anjeunna ngiring ilubiung ti ngawitan,” pokna.**
Éditor: Dadan Hendaya
