GENERASI kalahiran taun 2000an biasana ngan apal Pertahanan Sipil (HANSIP) téh nyaéta tukang ronda peuting nu maké baju khas héjo lukut sok kukurilingan mawa pepentung. Hansip di jaman ayeuna, mindeng dijadikeun heuheureuyan ku sabab lakonna disapirakeun. Tapi ulah salah, Hansip boga sajarah nu panjang sarta lakon nu teu lalawora dina naratas kamerdékaan jeung ngajaga Negara Kesatuan Republik Indonesia (NKRI).
Lintasan Sajarah
Dilansir ti bpblinmas.surabaya.go.id. Pertahanan Sipil (HANSIP) mangrupakeun salah sahiji komponén pangrojong dina konsép pertahanan nagara. Pertahanan sipil dimimitian ti jaman kolonial Walanda jeung didirikeun pikeun nyanghareupan serangan ti Jepang taun 1939.
Hansip didirikeun mimitina ku ngaran LBD (Lucht Bescherming Dients) ku Walanda pikeun jadi tim réaksi cepat nu ngainformasikeun jeung ngajaga masarakat tina serangan udara. Nalika Jepang ngawasa taun 1943, LBD dirobah jadi Pertahanan Sipil (HANSIP). Hansip diarahkeun pikeun pertahanan, pengerahan semesta.
Kawas diwartakeun ku tirto.id, Hansip ngalakukeun hiji hal nu moal bisa dipohokeun sajarah, pernahna 11 Oktober 1965 sanggeus G30S PKI, Hansip laksana néwak salah sahiji pamingpin ti G30S PKI, nyaéta Létnan Kolonél Untung. Kolonél Untung nyaéta komandan pasukan militér nu dipikahormat. Lain pasukan khusus RPKAD atawa unit Polisi Militér nu néwakna, tapi personil unit ti rakyat sipil nu mindeng dianggap réméh nu ngaranna Hansip.
Di jaman sanggeus Orde Baru jeung sapajang perkembangan jaman, unit héjo ieu diniléy geus teu rélevan jeung perkembangan, jadi tungtung lalampahanna téh aya di Pamaréntahan Susilo Bambang Yudhoyono nu ngaluarkeun Perprés Nomor 88 Taun 2014.
Pahlawan Tanpa Tanda Jasa
Sanajan geus dibubarkeun sacara resmi, Hansip masih ngabdi ka masarakat-masarakat nu ngabutuhkeun, siga ngajaga lingkungan pas peuting, nertibkeun acara hajatan, prosési ngurebkeun mayit jeung aktivis kamasarakatan séjénna.
Kareueusan ka jasa Hansip di jaman ayeuna beuki ngurangan, padahal lamun urang ningali kana sajarah, jasana ogé gedé, teu bisa dilalaworakeun. Urang salaku masarakat Indonésia kuduna leuwih bisa ngahargaan kana jasa para Hansip.
Dikutip tina detik.com, carita ti Uyung Aria, incu tina H. Ikik Suhayi nu kungsi miluan palatihan Hansip pikeun persiapan G30S PKI ngungkabkeun “Ningali foto-foto dokuméntasina, ningali berkas-berkas matéri palatihannana aya indoktrinasi, palatihan nganggo sanjata, ngadamel dapur umum sareng sajabana. Hansip téh luar biasa pisan, peran Hansip harita penting pisan. Abdi mah reueus janten incu saurang Hansip.”
Ayeuna mah manéhna keur upaya ngajaga marwah Hansip pikeun tetep ngawibawa. Sanajan manéhna sorangan ogé ngalakukeun ku hiji gerakan nu pikaseurieun. Manéhna usaha ngamasarakatkeun pamakéan jekét Hansip nu disebut pasukan UHA atawa Unggal Hajat Aya.
“Anéh wéh kitu, urang reueus ku jakét militér Amérika dugika terang ieu saragam basa perang Viétnam, ieu saragam Desert Strom sareng sajabana. Abdi mah hoyong urang sadaya ogé reueus nganggo acuk Hansip, ieu tah lokal pride urang. Hansip téh bagéan tina bangsa ieu. Urang badé hajatan nyuhunkeun bantosan Hansip, aya jalmi ngantunkeun nyuhunkeun bantosan Hansip, aya nanaon di lingkungan urang Hansip nu pangpayunna. Percanten, janten Hansip atanapi saukur mikareueus Hansip téh kerén,” ceuk Uyung
Editor : Rimaldi Pasya Mansoer
Foto: bekasi.pikiran-rakyat.com, halopedeka.com
