“MAÉN kumaha sia, latihan kumaha aing,” ceuk Abah Thohir. Kutipan éta negeskeun kumaha karakter ti saurang Indra Thohir, Palatih Pérsib Bandung nu laksana mawa loba gelar jeung sajarah. Kampiun liga perserikatan ahir jeung ngajuaraan Liga Indonésia perdana taun 1994 jeung 1995. Sajarah nu pantes dipikareueus ogé salaku warga Bandung nyaéta laksana mawa Pérsib Bandung ka perempat final Liga Champion Asia jeung jadi Palatih Pangalusna Bulanan Liga Champion Asia. Indra Mochammad Thohir lahir tanggal 7 Juli 1941 ti pasangan Bapak Asik jeung Ibu Omas. Anjeunna lahir di Cigereleng, Regol, nu ayeuna kasohor jadi Jalan Mohammad Toha.
Lalampahan
Dilansir tina bandungbergerak.id, Abah Thohir mikacinta pisan olahraga, anjeunna ngalanjutkeun studi ka Sakola Guru Pendidikan Djasmani (SGPD) nu aya di jalan Bali, Bandung. Taun 1962, Indra Thohir ampir asup skuad utama Pérsib pikeun kompetisi perserikatan 1964, malah mah geus nepika seléksi tahap ahir. Tapi, Indra Thohir harita leuwih milih ngalanjutkeun kuliah ka Akademi Pendidikan Djasmani (APD). Hiji jalan nu mistérius nu malah ngadampak gedé ka lalampahan Abah jadi légénda Pérsib Bandung.
Abah, nu resep kana loba olahraga, jiga badminton, atlétik, softball, kungsi jadi anggota tim nasional, jeung golf nepika ayeuna.
Karir kapalatihannana dimimitian ku ngajar di PS IKIP nu mangrupakeun salah sahiji klub intern Pérsib taun 1982. Maju ka taun 1984, Abah nincakkeun dampalna munggaran di kasebelasan Pérsib Bandung ku jadi palatih fisik. Gagal di taun 1992, Pérsib ngalakukeun parombakan, Abah diangkat jadi Pelatih Kepala Pérsib Bandung dibantuan ku Djadjang Nurdjaman salaku asistén palatih.
Taktikal, Disiplin, Idéalis
Abah tuluy nyieun hiji gebrakan nu di luar dugaan, Abah ngalarapkeun formasi 3-5-2. Hal éta jelas ngarewaskeun ku sabab di éra éta Pérsib Bandung kasohor ku pamaén sayapna jeung tim séjén ogé moal aya nu maké formasi éta. Formasi nu biasana dipaké nyaéta 4-3-3, 4-2-4-2, 4-2-4. Hal éta lain ngan hayang katémbong béda hungkul, tapi éta téh hasil panyukcrukan jeung pangajaran anjeunna.
Dilansir tina wawancara dina akun Youtube Halo Biru, anjeunna manggihan hiji métode palatihan séjén nu teu biasa. Abah nyaritakeun yén métode latihanna ku porsi nu militan, di mana para pamaén dititah lumpat ti Kabupatén Subang ka arah Lémbang, atawa tepatna Sari Ater.
Anjeunna nu resep maén golf éta ogé boga prinsip nu keukeuh jeung panceg pisan. Prinsip nu Abah pertahankeun nyaéta henteu maké pamaén asing sama sakali. Hal éta kungsi nimbulkeun kaributan, nyaéta “digulung” ku anggota déwan. “Abdi hoyong maju ku bangsa sorangan,” ceuk Abah.
Kabéh kacangcayaan éta dibuktikeun Abah ku inovasi jeung stratégi nu dibarengan ku kadisiplinan nu tungtungna mawakeun hasil nyaéta dérétan gelar jeung préstasi nu méntéréng. Indra Thohir ogé ngabuktikeun yén kualitas putra bangsa ogé teu éléh jeung kualitas pamaén luar nagri, malah mah bisa pasasaing leuwih jauh.
Pangaruh Abah ogé masih lumangsung nepika taun 2014, basa ditunjuk deui jadi Diréktur Téknik. Harita Pérsib Bandung ngajuaraan ISL 2014 jeung Piala Présidén 2015.
Rokok kretek nu ngebul khasna jeung sababaraha gelas kopi hideung jadi hal wajib pikeun pertandingan. Segut luar biasa!
Éditor : Rimaldi Pasya Mansoer
Foto: inews.id
