BANDUNG (NYUNDAYU). – Saurang notaris sénior Suwito Chandra dilaporkeun lantaran kasus panganiayaan ka wanoja nu ngaranna Lavonka Hambali (62), di Istana Regency, Pasteur, Kota Bandung geus ampir saminggu katukang. Diduga, aksi éta téh tungtung tina kateuresepan Suwito ku koméntar korban di grup Whatsapp warga satempat pakait pangwangunan kirmir anak walungan Citepus. Korban ngalaporkeun kajadian éta ka Polsék Cicendo, sanggeus bagéan panon jeung tarangna tatu.
Numutkeun tokoh warga satempat, Yoséf Yulia, korban nyaritakeun kajadian éta liwat telepon ka manéhna sanggeus diteungeul. “Anjeunna katémbong émosi, tapi abdi nyungkeun tenang sareng ngalaporkeun ka jalur hukum. Ahirna Bu Lovanka ngalaporkeun kasus éta ka Polsék Cicendo,” pokna.
Dijelaskeun, mimitina Lovanka nanyakeun pangwangunan proyék kirmir walungan di deukeut imahna. Suwito salaku pupuhu Himpunan Warga Istana Regency (HWIR) ménta datang ka imahna. “Tapi ku sabab teu aya nu ngajajapkeun, Lovanka teu tiasa mangkat. Teras Suwito téh dongkap langsung ka bumi Lovanka diréncangan ku satpam sareng Sekretaris HWIR. Panginten kusabab émosi, anjeunna dongkap bari neunggeul pager bumi korban,” ceuk Yoséf mantan Pupuhu HWIR.
Henteu ngan éta, Suwito ogé diduga neunggeul korban ku tangan kosong sakali nu keuna ka bagéan tarang jeung panon beulah katuhu. Ku sabab kajadian éta, Lovanka jadi bancunur di bagéan tarang katuhu jeung tatu di bagéan kongkolak panon katuhu.
Yoséf teu ngarti, naha sanggeus aya laporan palanggaran Pasal 351 KUHP ngeunaan panganiayaan, Suwito teu ditahan. “Abdi kungsi ningali anjeunna aya basa di caket anak sungai. Naha anjeunna teu ditahan, padahal kasus panganiayaan atos jelas buktos sareng saksi-saksina, kedahna mah ditahan. Ku sabab éta abdi dongkap ka Polsék Cicendo. Namung basa di ditu, kaleresan Pa Kapolsékna nuju di luar, janten abdi teu terang alesan teu ditahanna téh naon,” pokna.
Kapolsék Cicendo Kompol Herbas Sudewo nu dihubungan liwat saluran telepon nyebutkeun, kasus ieu jadi gésékan antartatangga, jeung geus dibéréskeun maké restorative justice. “Jalmi nu dilaporkeun ogé kungsi ditahan sakedap, tapi ku sabab atos aya perdamaian di antawis kadua belah pihak, janten teu dilajengkeun deui kasusna.”
Numutkeun Yoséf, sabenerna kasus éta téh disababkeun tina kateuresepan warga ku kasombongan nu ditémbongkeun ku Suwito. “Nu kahiji, anjeunna ngalanggar AD/ART HWIR ku sabab ngangkat diri nyalira janten pupuhu, teu aya badami antarwarga. Teras seueur kawijakan nu dilakukeun tapi henteu ngalangkungan prosedur sareng obrolan bareng warga sanésna.” pokna.***
Éditor: Dadan Hendaya
