BANDUNG (NYUNDAYU). – Gubernur Jabar, Ridwan Kamil diwartakeun rék ngumumkeun partai politikna. Ku sabab salila ieu Ridwan Kamil ngan ngumumkeun bakal ngagabung jeung partai politik tapi teu nyebutkeun iraha waktuna.
Tapi kapastian iraha gabungna Ridwan Kamil ayeuna rada saeutik kabuka. Hal éta sanggeus kelompok rélawan pangrojong Ridwan Kamil, Gerakan Nasional Indonésia Juara (GNIJ) nepikeun waktu ngagabungna Emil, sebutan akrabna, ka partai politik.
“Upami ngadangu tina obrolan nu ahir mah kinten-kinten sasih Désémber,” ceuk Sékjén GNIJ, Suhara Iskandar basa dina kagiatan Rapat Pimpinan GNIJ di Kota Bandung, Senén (26/9).
Numutkeun Suhara, Emil basa papanggih jeung para pangrojongna sababaraha waktu katukang kungsi ngomongkeun waktu ngagabungna ka parpol. Naon waé nu engkéna jadi kaputusan Emil, ceuk manéhna, rélawan bakal tetep ngarojong jadi calon RI 1.
Suhara malah mah nyebutkeun, mantan Wali Kota Bandung ieu geus diperhitungkeun jadi caprés ku sababaraha partai nu ngagabung dina Koalisi Indonésia Bersatu (KIB) jeung Gerinda nu dikomandoan ku Prabowo Subianto.
Teu ngan nepi ka dinya, Suhara ogé nyorot kana hasil survéi nu nempatkeun salaki Atalia Praratya ieu. Kang émil meunang sora nu stagnan nyaéta aya di posisi kaopat dibandingkeun jeung calon séjén nu cenah mah bakal maju.
Alesan tina hasil éta, pokna, ku sabab Emil tacan ngagabung parpol jeung kampanyeu ka sakabéh Indonésia.
“Urang sadaya salaku rélawan mikahoyong kedah di nomer 1, kedah di nomer 1 sareng teu hoyong Pa Ridwan Kamil di nomer 2,” ceuk Suhara.
Dina waktu nu teu lila, rélawan Ridwan Kamil bakal ngagelar Rapimnas di Jakarta tanggal 8 nepika 9 Oktober. Saloba 34 provinsi cenah mah bakal ngahadiran Rapimnas engké.
Suhara ngarepkeun, Rapimnas engké bakal beuki nguatkeun Ridwan Kamil ka 2024.
“GNIJ atos didéklarasikeun di unggal provinsi, nu ahir di Pontianak, urang sadaya atos ngadéklarasikeun di Acéh sareng Pak RK dugika Papua, atos didéklarasikeun. Pakait sareng hal ieu, urang sadayana hoyong peran sadaya ti aranjeunna di GNIJ gaduh kayakinan pinuh supados Pak Ridwan Kamil maju janten Présidén di 2024.” pokna.
Éditor : Zhafran Pramoedya
Sumber: bandung.inews.id
Foto: twitter.com/aniesbaswedan
