BANDUNG (NYUNDAYU). – Kajadian nahas keuna ka 5 urang pamuda sanggeus diserang sacara ngadadak ku gorombolan jalma nu teu dipikawanoh di Jalan Gatot Subroto (Gatsu) Kecamatan Lengkong, Kota Bandung, Minggu (25/9/2022) janari.
Dampak tina serangan éta, lima urang pamuda luka parah. Para korban ngalaman tatu katusuk jeung kakadék ku pakakas seukeut. Informasi pakait kajadian penyerangan éta sumebar ngaliwatan pesen WhatsApp. Tina vidéo nu sumebar, aya sababaraha urang nu tatu. Malah mah karekam ogé aya ramo leungeun korban nu ampir buntung.
Henteu ngan éta, aya oge nu ngaharurung kanyeyerian ku sabab katusuk dina bagéan beuteungna.
Kepala Unit (Kanit) Reskrim Polsék Lengkong, Ipda Beben ngonfirmasi ayana kajadian lima pamuda nu diserang ku gorombolan éta.
“Muhun leres (kajadian penyerangan gorombolan nganggo motor ka lima pamuda),” ceuk Kanit Réskrim Polsék Lengkong Ipda Beben basa dikonfirmasi, Minggu (25/9/2022).
Ceuk Ipda Beben, pernahna kajadian éta di Jalan Gatot Soebroto, deukeut Hotél Papandayan, Kota Bandung.
“Kajadiannana janari tadi, tabuh 10.30 WIB,” ceuk Ipda Beben.
Ipda Beben ngungkabkeun, dumasar kana katerangan sababaraha saksi, kaasup korban, kajadian éta mimitina basa lima korban keur konvoi motor terus pasalingsingan jeung gorombolan palaku di Jalan Gatsu. Jol kajadian wéh aksi penyerangan éta.
Tacan kanyahoan naon nu jadi motif aksi penyerangan éta.
Ayeuna, lima urang nu jadi korban penyerangan éta geus meunang parawatan. Maranéhna geus dipéntaan katerangan sangkan urang sadaya apal idéntitas palaku penyerangan.
“Kanggo palaku, ayeuna nuju dina panalungtikan,” pokna
Éditor : Rizal Fadillah
Sumber: bandung.inewsraya.id
Foto:liputan6.com
