BANDUNG (NYUNDAYU) – Kepolisian Daerah Jawa Barat (Polda Jabar) nyaram The Jakmania nongton langsung laga Pérsib Bandung vs Persija Jakarta dina lanjutan liga 1 musim 2022/2023 minggu ka-11.
Dumasar kana jadwal, pertandingan éta bakal digelar di Stadion Gelora Bandung Lautan Api (GBLA), Gedébagé, Kota Bandung poé Minggu (2/10/2022).
Kawas nu urang sadaya apal, patengahan Séptémber, Pérsib datang ka Kandang Aréma di Malang dina lanjutan Liga 1 minggu ka-10. Pérsib Bandung jeung Aréma FC sabenerna boga rivalitas nu luhur ku sabab tali babarayaan antara rival. Pérsib Bandung jeung Persebaya Surabaya terus Aréma FC jeung Persija Jakarta.
Pupuhu Panpel Aréma FC, Abdul Harris sanggeus dilakukkeunna rapat koordinasi antara wawakil ti Pérsib, Aréma, jeung Pihak Kapolisian sapuk aya 500 tikét pikeun pendukung Pérsib. Pertandingannana ogé lumangsung aman jeung kondusif.
Nyanghareupan pertandingan Pérsib ngalawan Aréma nu kondusif, Teddy Tjahyono, Diréktur ti Pérsib Bandung ngarepkeun The Jakmania bisa hadir di Stadion GBLA méh bisa ngainisiasi katengtreman dina rivalitas nu kaleuleuwihan antara kadua tim. Tapi, hal éta kawasna teu jadi dilaksanakeun ku sabab alesan kaamanan.
Ceuk Kabid Humas Polda Jabar, Kombes Pol Ibrahim Tompo, larangan éta dikaluarkeun pikeun ngajauhan kajadian nu teu dipikahayang kawas tragédi Haringga Sirla (23) Séptémber 2018 harita.
“Teu diijinan (The Jackmania, suporter Persija dilarang dongkap ka GBLA).” ceuk Kombes Pol Ibrahim Tompo ka wartawan ngaliwatan pesen singkat, Rebo tanggal 21 kamari.
Numutkeun anjeunna, kaputusan ngalarang The Jakmania datang ka Bandung éta mangrupakeun hasil koordinasi jeung panitia pelaksana pertandingan.
“Hasil kasapukan sareng panitia.” pokna.
Polisi dipastikeun moal bakal ngantepkeun pendukung Persija gagabah datang ka Stadion GBLA pikeun nongton laga klasik éta.
“(The Jakmania) moal bakal diijinan asup,” ungkabna.
Kawas nu urang sadaya apal, insidén mindeng kajadian lamun Pérsib ngajamu Persija di Bandung. Kitu ogé sabalikna, mun Persija ngajamu Pérsib Bandung di Jakarta.
Béntrok kadua suporter tim mindeng kajadian. Malah mah, sakapeung mah pendukung nyerang bus pamaén tim rival.
Insidén maot kungsi kajadian basa Pérsib Bandung ngajamu Persija Jakarta di Stadion GBLA bulan Séptémber 2018 harita. Basa éta, Haringga Sirla, anggota The Jakmania maksa datang ka Stadion GBLA. Bobotoh apal kadatangan Haringga, akibatna fatal.
Nonoman asal Jakarta éta digebugan nepika maot. Dampak tina kasus ieu, Pérsib Bandung teu meunang maén di Kota Bandung salila dua musim.
Sedengkeun para palaku nu ngagebugan Haringga Sirla nepika maot, dihukum 7, 8,5 jeung 9,5 taun panjara, Salasa 21 Méi 2019 katukang.
Éditor : Rizal Fadillah
Sumber: bandungraya.inews.id
Foto: pikiran-rakyat.com
