BANDUNG (NYUNDAYU), – Badan Usaha Jalan Tol (BUJT) teu miboga niatan pikeun méré harepan palsu alias PHP ka publik, pakait jeung waktu penyelesaian Jalan Tol Cisumdawu. Kulantaran loba teuing, faktor nu nyababkeun elatna pangwangunan jalan tol sapanjang 60,1 KM nu nyambungkeun Cileunyi nepika Dawuan (Kertajati, Majalengka) éta.
“Kanggo urang sadayana salaku investor, teu aya alesan kanggo ngelatkeun waktos penyelesaian. Kumargi pami langkung lami, langkung ageung deui bunga bank sareng pangaluaran urang sadaya,” tandes Diréktur Téknik PT Citra Karya Jabar Tol (CKJT) Bagus Medi, basa diskusi nu digelar Jaringan Media Siber Indonesia (JMSI) Jabar bareng KADIN Jabar, nu judulna “Kupas Tuntas Bandara Kertajati”.
Diskusi sési kadua nu fokus kana ngabahas perkembangan pangwangunan Jalan Tol Cisumdawu ieu, dilaksanakeun poé Jumaah (23/9) siang, di Gedung Menara KADIN Jabar, sacara hibrid.
Hadir salaku narasumber, Kepala Perencanaan Teknis Badan Pengatur Jalan Tol (BPJT) Karamullah Wajhahu, jeung dua pingpinan BUJT, nyaéta Diréktur Téknik PT. Citra Karya Jalan Tol (CKJT) Bagus Medi jeung Wawakil PT. Brantas Abipraya, Agustinus Sudrajat.
“Dina prosés konstuksi, nu kahiji kedah réngsé téh nyaéta lahan. Janten minangka aya lahan nu teu acan bebas, urang sadaya teu tiasa nanaon. Teras nu kadua, hal téknis. Sapanjang tol seueur gunung, pasir, gawir. Poténsina nyaéta longsor, poténsi longsorna ageung, sapertos kajadian di séksi dua,” ceuk Bagus.
Salaku pimpro, Medi miboga komitmen sangkan di panungtung taun ieu, sakabéh konstruksi jalan tol bérés. “Mung konturna sesah pisan. Aya tumpukan lahan nu kapaksa urang sadayana robih janten jambatan, kumargi hawatos longsor. Tah éta téh nyéépkeun waktos. Kumargi kitu jam damel urang sadayana sanés deui nu biasa, tapi luar biasa, nyaéta 24 jam teu lirén,” pokna.
Acara ini nyaéta sési kadua tina serial diskusi sual Bandara Kertajati, nu digagas JMSI Jabar jeung KADIN Jabar. Dina sési kahiji, hadir salaku narasumber, anggota Bangar DPR RI H. Mulyadi, Asda Ekbang Setda Jabar Taufiq Budi jeung Dirut BIJB Muhammad Singgih.**
Éditor: Dadan Hendaya
