BANDUNG (NYUNDAYU), – Badan Usaha Jalan Tol (BUJT) kudu geuwat ngabéréskeun prosés ganti rugi lahan ka warga nu lahan jeung wangunanna keuna ku proyék pangwangunan Tol Cisumdawu. Kulantaran bisa jadi, ka-delay-na pangwangunan jalan tol sapanjang 60,1 KM éta, disababkeun ku hak warga nu tacan dituntaskeun.
“Elatna pamungkasan Jalan Tol Cisumdawu ieu téh tiasa kulantaran teu berkah, aya hak-hak warga nu teu acan dibérésan,” tandes Wakil Ketua KADIN Jabar Yayat S. Andhie, basa sesi tanya jawab dina diskusi nu digelar Jaringan Media Siber Indonesia (JMSI) Jabar babarengan jeung KADIN Jabar, nu judulna “Kupas Tuntas Bandara Kertajati”.
Diskusi nu fokusna kana ngabahas perkembangan pangwangunan Jalan Tol Cisumdawu ieu, dilaksanakeun poé Jumaah (23/9) siang, di Gedung Menara KADIN Jabar, sacara hibrid.
Hadir salaku narasumber, Kepala Perencanaan Teknis Badan Pengatur Jalan Tol (BPJT) Karamullah Wajhahu, jeung dua pingpinan BUJT, nyaéta Diréktur Téknik PT. Citra Karya Jalan Tol (CKJT) Bagus Medi jeung Wawakil PT. Brantas Abipraya, Agustinus Sudrajat.
Numutkeun Agustinus nu miboga tanggung jawab dina hal ganti rugi, aya kénéh sakitar 5% lahan nu tacan réngsé prosés ganti rugina. “Sapalih kulantaran teu acan sapuk sareng harga, mung sapalih deui mah disababkeun ayana parobihan pamilik, nu nyababkeun kantundana pamayaran,” pokna.
Pikeun gancangna nuntaskeun prosés ganti rugi, pihakna nawarkeun biaya karohiman nu leuwih luhur. “Aspék ganti rugi ieu janten salah sawios nu ngajantenkeun elatna panuntasan jalan tol. Mung tiasa dipastikeun, niléy ganti rugina saé pisan hargana. Mugia tiasa enggal réngsé dina waktos anu caket,” émbohna.
Acara ieu nyaéta sesi kadua tina serial diskusi sual Bandara Kertajati, nu diinisiasi JMSI Jabar jeung KADIN Jabar. Dina sesi kahiji, hadir salaku narasumber, anggota Banggar DPR RI H. Mulyadi, Asda Ekbang Setda Jabar Taufiq Budi jeung Dirut BIJB Muhammad Singgih.**
Éditor: Dadan Hendaya
