BANDUNG (NYUNDAYU). – Pamaréntah Kota (Pemkot) Bandung miboga rencana ngawangun rumah pompa pikeun nungkulan banjir di Kopo Citarip. Rencanana dina September ieu baris diwangun sanggeus prosés lélangna bérés.
Kepala Bidang Pengendalian Daya Rusak Air Dinas Sumber Daya Alam dan Bina Marga (DSDABM) Kota Bandung, Dini Dianawati nétélakeun, rumah pompa ieu bakal nampung aliran cai samentara. Sanggeus éta dikompa ka walungan.
“Kumargi panampung walungan Citarip tos teu katampung. Janten urang solusikeun rumah pompa, ngalihkeun cai ti saluran ka walungan,” ceuk Dini, Rebo (14/9/2022).
Pémkot Bandung ogé keur ngarapihkeun drainase nu aya di Kopo Citarip. Ngan, aya sababaraha hahalang nu ku Dini rasakeun lumayan ngahambat prosés ngabenerkeun drainase. “Di Kopo Citarip éta tos padet ku padumukan. Janten rada sesah ogé pami bade ngabebenah sadaya drainase. Kumargi, seueur bumi nu diwangun di luhureun saluran,” pokna.
Dini ngémbohan, pihakna geus mimiti nertibkeun jeung miara drainase di sababaraha titik. Hal éta ogé terus dikoordinasikeun kénéh jeung pihak satempat. “Targétna rumah pompa sasih ieu parantos réngsé sareng tiasa diaktifkeun. Ayeuna tos aya pemenang lelang sareng tos néken kontrak. Mugia tos tiasa digarap pangwangunanna.” pokna
“Taun ieu rencanana drainase ogé bade dilereskeun,” émbohna dilansir ti bandung.go.id. Rencanana hiji rumah pompa miboga dua unit kompa. Hal nu ngabédakeun jeung rumah pompa séjénna nyaéta spésifikasina.
“Mugia spek nu ayeuna tiasa nyedot leutak ogé. Kamari urang sadayana tos ngabandingkeun kompa-kompa nu cocok. Kumargi benten lokasi, benten deui kompana,” jelasna
Numutkeun anjeunna, daérah Kopo Citarip mangrupakeun wewengkon nu miboga loba sédimén. Ku kituna merlukeun kompa nu bisa nyedot leutak ogé. “Kamari urang sadayana ditawaran ti pausahaan di Surabaya jinis kompa ieu. Urang sadayana munggaran badé nyobi di Bandung,” pokna.
“Kamari parantos studi banding ka Pekalongan. Di ditu parantos nganggo kompa ieu. Numutkeun aranjeunna, pamiaraanna ogé rutin dilakukeun ku pihak pausahaan pompana,” jelasna
Mangsa ditanya ngeunaan faktor kajadianna banjir di Kopo Citarip, Dini ngajelaskeun, daérah padet warga jadi salah sahiji alesanna. Malah mah, loba imah nu diwangun di luhureun saluran cai. Nepika cai ngabudal ka jalan mun mangsa turun hujan. “Kanggo sadaya warga Bandung, hayu urang ciptakeun kota nu ramah lingkungan. Saling ngajaga lingkungan séwang-séwang, minimal ku teu miceun sampah sambarangan. Supados teu mengpetan drainase nu tos aya,” tandesna.
Éditor : Rizal Fadillah
Sumber: bandungraya.inews.id
Foto: mediaindonesia.com
