BANDUNG (NYUNDAYU), – Lamun umumna kota Bandung kasohor ku wisata alam jeung wisata kulinér, tapi aya loba ogé pilihan tempat wisata sajarah di Ibu Kota Jawa Barat ieu.
Tempat-tempat nu boga sajarah di Bandung miboga sajuta carita nu bisa ngabius para wisatawan nu datang. Kota Bandung ogé mangrupakeun salah sahiji kota penting jeung boga sajarah di Indonésia nu jadi saksi kamerdékaan Indonésia.
Di Bandung, aya loba pisan wangunan-wangunan penting nu nyimpen loba carita ngeunaan Bandung di jaman baréto.
Ieu aya 4 rékoméndasi tempat wisata sajarah pangkasohorna di Bandung, dirangkum tina sababaraha sumber.
- Gedung Saté
Gedung Saté nyaéta hiji déstinasi wisata nu ulah kaliwat ku para wisatawan nu daratang ka Bandung. Gedung ieu boga sajarah panjang ti jaman kolonial Walanda jeung jadi salah sahiji saksi sajarah lalampahan kota Kembang ieu.
Ngutip tina laman Sistem Registrasi Nasional Cagar Budaya nu Kemendikbud, gedung ieu mimiti diwangun taun 1920 ku pamaréntah Walanda. Niat mimitina, Gedung Saté bakal dibikeun pikeun Departemen Verkeer en Waterstaat atawa Departemen Pekerjaan Umum jeung Pengairan. Di beulah wétan gedung ieu, diwangun ogé gedung Pusat Pos, Telegram jeung Telepon. Pangwangunan Gedung Saté asup dina program pamaréntah Walanda dina raraga pamindahan pusat militer Hindia-Walanda, ti daérah Meester Cornelis di Batavia (ayeuna Jatinagara, Jakarta) ka Bandung. Arsiték andal nu ngalahirkeun desain méwah Gedung Saté nyaéta Ir. J. Gerber jeung timna. Panundaan batu pertama gedung ieu dilakukeun ku Johanna Catherina Coops, budak Wali Kota Bandung basa harita, B. Coops.
Sanggeus diresmikeun, Gedung Saté dibéré ngaran Pusat Pamaréntah atawa Gouvernements Bedrijven jeung dipaké jadi Kantor Jawatan Pekerjaan Umum. Basa Nusantara dikawasa ku Jepang, gedung ieu difungsikeun pikeun pamaréntahan Jepang.
Sanggeus Indonésia merdéka, gedung ieu dipaké jadi Kantor Departemen Pekerjaan Umum terus di taun 1980, resmi dipake jadi kantor pamaréntahan Jawa Barat nepika ayeuna.
- Jalan Braga
Lain ngan saukur wangunan, wisata sajarah di Bandung ogé bisa ku ngadatangan hiji jalan légendaris jeung kasohor, nyaéta jalan Braga. Ngaran jalan ieu sabenerna geus dipaké ti jaman kolonial Walanda jeung terus dipertahankeun nepika ayeuna. Jalan Braga ieu idéntik ku wangunan khas Éropa di beulah katuhu jeung kénca jalanna.
Kira-kira taun 1882, saurang Asistén Résidén Walanda nu ngaranna Pieter Sitijhof méré ngaran Bragaweg ka kawasan ieu ku sabab lobana wangunan alus nu aya di jalan Braga, jadi loba wisatawan, utamana tamu nagara nu datang ti China jeung wilayah Éropa séjén nu daratang ka Braga.
Braga ogé kasohor jadi kawasan élit ku rupa-rupa hiburan jeung fasilitas méwah khas Éropa.
- Monumén Bandung Lautan Api
Monumén Bandung Lautan Api ogé teu tinggaleun tina daftar déstinasi wisata nu wajib didatangan lamun keur di Bandung. Saluyu jeung ngaranna, monumén ieu diwangun pikeun miéling kajadian Bandung Lautan Api 23 Maret 1946, di mana masarakat Bandung usaha sakuat tanaga pikeun mertahankeun kamerdékaan.
Basa harita, dina periode waktu 7 jam aya kira-kira 200 rébu masarakat Bandung nu ngaduruk imahna sorangan. Terus, maranéhna mangkat ka wilayah pagunungan di beulah kidul Bandung.
Hal éta maksudna sangkan Bandung teu dipaké pikeun markas militér dina perang kamérdekaan.
Monumén ieu aya di bagéan kalér Lapangan Tegalega. Cenah mah, monumén Bandung Lautan Api jangkungna 45 méter ku 9 widang sisi.
Pangwangunannana dilakukeun taun 1981, dumasar kana rancangan seniman kontemporér, Sunaryo.
- Gedung Merdéka
Gedung Merdéka di tengah kota Bandung mangrupakeun tempat dilaksanakeunnana Konférénsi Asia Afrika 18 nepika 24 April 1955. Dina laman Kemenlu, diungkabkeun yén gedung ieu diwangun taun 1895 jeung jadi tempat kumpulna masarakat élit Walanda, nu diwengku ku opsir nepika pangusaha kebon téh.
Umur kamerdékaan, gedung ieu dijadikeun markas nonoman Indonésia di Bandung dina nyanghareupan tentara Jepang. Nepika ahirna, dijadikeun lokasi konférénsi sajarah di taun 1955.
Sagigireun éta, Gedung Merdéka ogé erat kaitanna jeung Museum Konférénsi Asia Afrika (KAA) nu aya di gigireunnana.
Peresmian Museum KAA dilakukeun 24 April 1980 ku Soeharto.
Acara peresmian éta bareng jeung miéling 25 taun KAA di Bandung.***
Sumber : bandungraya.inews.id/Rizal Fadillah
