BANDUNG (NYUNDAYU). – Katelah jadi Kota Kréatif, Bandung geus loba ngalahirkeun musisi-musisi nu unggul ku rupa-rupa karya jeung ciri hasna séwang-séwang. Salian ti musisi papan atas, loba oge musisi ‘kaki lima’ nu bisa ngirut fans musik lemah cai.
Salah sahiji musisina nyaéta 3 Pemuda Berbahaya. Band asal Kota Bandung éta malah mah keur naék daun ayeuna-ayeuna ieu. Liwat aksi nga-cover lagu nu diunggah di Youtube, musik ti 3 Pemuda Berbahaya geus loba kadéngé di tengah masarakat.
3 Pemuda Berbahaya dibentuk ku tilu urang pamuda nyaéta Taufik Suyandi (Opik), Helmy Muhammad Syaban (Metzbellamy) jeung Kustiaman (Abet) di ahir 2017 kamari. Maranéhna tiluan silih kenal kulantaran remen ngeusi acara live musik ti kafé ka kafé di Kota Bandung.
“Munggaran 3 Pemuda Berbahaya (taun) 2017, urang sadaya kapungkur perform di kafé-kafé nu kantos robih personél nu ahirna 2018, urang sadaya ngawitan karir dina platform Youtube sareng dugika ayeuna solid,” ceuk Metz sang vokalis basa ngobrol jeung detikjabar teu lila ieu.
Tina silih kenal basa ngeusi live musik éta, katilu pamuda éta terus tambah remen midang babarengan. Opik terus miboga inisiatif ngajak Metz jeung Abet pikeun nyieun kontén Youtube. Kontén éta mimitina ngan dipaké jadi portofolio wungkul.
“Opik ngajakan maén Youtube yu kanggo portofolio urang. Ti dinya urang sadaya ngawitan nga-cover lagu. Ngawitan mah biasa wé nu nongton mung hiji dua. Di 2020 sasalad éta job show cancel sadayana urang fokus kana Youtube. Ti dinya urang diajar risét kumaha carana urang seueur nu nongton. Ti dinya éta urang kabentuk,” ceuk Abet, basis 3 Pemuda Berbahaya.
Metzkustik jadi ngaran awal-awal tiluan maén babarengan. Pas di hiji momen, maranéhna nimu hiji ngaran nu cocog diseumatkeun, nyaéta 3 Pemuda Berbahaya.
“Kapungkur namina Metzkustik. Mung pendak nami 3 Pemuda Berbahaya nu teu kahaja nami ieu kabentuk. Ngawitan tina interaksi sareng panongton, urang sadaya ngobrol sareng panongton teras urang sounding yén urang ieu téh band nu béda muda jeung berbahaya kitu,” ceuk Metz.
“Ngawitan nuju masihan nami 3 Pemuda Berbahaya teu acan kénging hartosna naon. Pas aya hiji tempat kafé di Sukajadi ownerna naros naha namina 3 Pemuda Berbahaya, langsung spontan berbahaya, hartosna berbakti ka bunda jeung ayah. Éta ahirna harti tina 3 Pemuda Berbahaya. Tina spontan sadayana,” émboh Opik.
Ampir lima taun kakarya, 3 Pemuda Berbahaya geus nga-cover loba lagu. Total 500 leuwih kontén geus diupload ka Youtube maranéhna. Sajaba nga-cover lagu, maranéhna oge geus nyieun 6 lagu sorangan nu slaah sahiji judulna “Basa Basi Busuk”.
Éditor : Bima Bagaskara
Sumber: detik.com/jabar
Foto: jabarekspres.com
